Tugnaw pay manikop

Duha pa lang gani ka higayon, diin nagkaila si Bartolo, uban kang Repsali ... sulod sa may Moon-light Serenade Beer Garden, nga kasagaran maoy hangout nga imnanan niya samtang gikan siya sa iyang trabaho sa opisina, dali ra silang nagkasuod.

“Sumala gud kanimo Bartolo ... kun ganahan ka modala kanako karong gabhiona ... aron kitang duha mo-check in?’ ni Repsali pa nga mapahiyumon.

Usa man gud ka Assistant Warehouseman kini si Bartolo ug kanunay mag-overtime sa iyang trabaho.

Lawom na nga gabii kini mahiuli sa ilang balay nga kasagaran hiabtan niya ang iyang asawa nga mahinanok na pag-ayo uban sa bugtong nilang anak nga babaye ning ilang dapit sa Sanciangko, diin nangabang sila og apartment.

Sa sinugdan ... wa kini ikahibulong ni Lorna, kay lagi kasagaran nga irason ni Bartolo, nga aduna sila’y monthly inventory nga kinahanglan humanon ang ilang report ... pinaagi sa pag-overtime.

“Nagduda na gayod ako kanimo Bartolo nga aduna kay gikabuangan nga babaye?” nagpaminti nga namulong si Lorna.

“Wa ka ba maghunahuna ... sa ato karong kahimtang Bartolo nga mag-abot ang atong utang ug maningilay sa balayranan sa atong suga, sa apartment nga ato karong gipuy-an?”

Wa motingog si Bartolo. Gani ang iyang binulan nga suweldo lakip na ang iyang overtime maayo nalang kun iyang ihatag og hurot sa iyang asawa.

Miabot ang adlaw nga wa palandunga ni Bartolo. Maglugos siya og pangihi. Sakit ang iyang pus-on ug nagkaluya ang iyang kalawasan.

Sulod sa may klinika ni Doktor Gaspar Cañeda, nagpanglingo-lingo ang mananambal ug nagkanayon.

“Based upon the result of your Urinalysis Mister Bartolo Enciso ... positibo ka nga may sakit sa Aids!”

Hapit matikay-ang sa gilingkoran si Bartolo ug igo na lamang siya midanguyngoy.

Alang kaniya ulahi na ang tanan kay milamay na kining iyang sakit. Didto pa niya hibaw-i ang tanan nga si Repsali diay usa ka prostitute nga nagbaligya og unod nga mao na hinuon ang naghatod kaniya ngadto sa dimalas.

Nakatuaw sa hilom si Bartolo ug nagkanayon!

“Mao diay nga humok kaayo og ilong si Repsali ... kay tugnaw pa man diay nga manikop!” (Kataposan)