Kahibulungang pagkaluwas sa kinabuhi

Bisan sa kahugot nga paggunit ni Ramon sa kamot ni Linda, iyang asawa, nabuhian gyud niya. Ang iyang singgit og pakitabang gilamoy na naghagiyos nga hangin sa bagyong Sendong. Nawad-an siya sa iyang panimuot kay ang nalukang kahoy nga iyang nagakus mituyoktuyok dihang gianod sa kusog nga baha gikan sa kinaibabwang bahin sa Mandulog River.

Sa hospital na sa Iligan siya makamatngon og buot. Moping-it ang iyang nawong kun molisoliso tungod sa kasakit sa mga bun-og nga matandog. Nanglagom ang iyang lawas sa bun-og. Tulo na ka adlaw niyang hinigda. Nagpunay la’g handuraw sa iyang nangagi.

Ilong tuwapos na siya. Siya ug ang iyang mga ginikanan mga pasahero sa barko nga gikusokuso ug gilunod sa bagyong Unsang sa tuig 1988. Usa siya sa hipalgang buhi. Sa dos anyos niyang pangedaron niadtong panahona daghang nagtuo nga giluwas siya sa Ginoo. Tungod kay ang iyang amahan ug inahan nangamatay na man ug wala’y mga paryente nga miangkon kaniya, gisagup siya sa Paroko sa simbahan sa Laray.

Sa nag-edad na siya og singko anyos, gisuginlan siya sa paroko mahitungod sa pagkamatay sa iyang ginikanan ug sa iyang kahibulungang pagkaluwas sa bagyong Unsang.

Daghan ang midayeg sa iyang kabuotan, kamatinahuron, ug kamakinaadmanon; mga kinaiya nga angay sa iyang pangandoy nga magpari. Migraduwar siya sa elementarya ug high school nga valedictorian. Tungod sa talagsaon niyang kaalam, sayon ra kaayo niyang gipasar ang mga eksaminasyon nga gikinahanglan aron makasulod, makapuyo sa seminaryo ug mag-eskuyla sa pagkapari nga wala’y bayad. Siya maoy giila nga hawod sa mga seminarista kun ang klase maghisgut na og teyolohiya.

Panahon sa ilang tinuig nga bakasyon, mikuyog siya sa iyang kaubang seminarista nga taga Iligan City. Didto niya nakaila si Linda, nga nakapausab sa dagan sa iyang kinabuhi. Wala na siya mopauli sa seminaryo. Nakigminyo siya ni Linda ug didto na sila mamuyo sa siyudad sa Iligan.

Naputol ang paghanduraw ni Ramon sa dihang gikuhaan siya’g kusog sa dugo sa nars nga gaatiman niya. Gipangutana niya ang nars: “Ania ba si Linda, akong asawa?”

“Ang imong asawa giisip nga patay na, uban sa wala hikit-ing mga tawo nga gituhoang nangamatay kay natabunan sa lapok ug dinahili sa yuta, resulta sa bagyong Sendong.”

Mipiyong si Ramon nga luhaan ang mga mata tungod sa kamatayon sa iyang asawa. Siya mismo nakasaksi sa mga panghitabo niadtong gabhiona. Wala siya makatoo nga mabuhi pa siya niadtong hitaboa. Ang iyang kinabuhi kaduha na maluwas, una sa bagyong Unsang ug ang ikaduha sa bagyong Sendong. Misantop karon sa iyang hunahuna nga kining paglugway sa iyang kinabuhi maoy usa ka timailhan nga aduna siya’y bathalaong buluhaton nga iyang pagahimoon.

Gumikan sa kahibulungang pagkaluwas sa iyang kinabuhi, nakahukum si Ramon nga ihalad na niya ang tibuok niyang panahon sa pagpangalagad sa misyon sa simbahan. Inig gula niya sa hospital mobalik siya sa seminaryo alang sa katumanan sa iyang pangandoy nga magpari. (Katapusan)