Uhong

Ning buntaga, gitutokan ni Jimmy ang nag-inusarang uhong nga himsog kaayong nagtuybo kilid sa punoan sa lubing limbaon. Nakapahiyom siya nga nagsud-ong sa mibuswak nga uhong. Miirag siya sa limbaong lubi ug nagkibutkibot ang baba.

“Ang uhong tipik na’s akong kagahapon...!”

Bugtong anak si Jimmy. Ang iyang tatay Berto ug nanay Sidra, nabuhi sa panguma sa naganod nang parsela sa banika. Ug kay dili na magsilbe ang tinuboan sa mais ug utanon sa pansil nga yuta sa banika, mitrabaho ang iyang mga ginikanan sa asyenda’s tubo sa ilang baryo bisan sa kabarato sa suholan niini.

Gikan sa elementarya ug hangtud na sa hayskol naanad na si Jimmy sa pinobre nilang pagkaon, ilabi na sa iyang bawon sa eskuylahan. Sinaksakan og saging, sinaksakan og kamoteng bulanghoy ug sinaksakan og kamoteng bagon ang sagad nga bawon ni Jimmy nga kan-ong mais sa eskuylanan. Kalagmitan, kutob lang sa Miyerkules nga adunay sud-an nga bawon si Jimmy sa ginamos ug kaling. Matag Huwebes ug Biyernes, sinugbang uhong na ang isud-an ni Jimmy sa eksuylahan.

“Bahinon lang nato ning naibot kong uhong, Jim...!” usa ka buntag maoy naabtan ni Jimmy si Minda nga maoy nakauna didto sa tugkanan niya sa uhong.

“Ganahan sab diay ka’s uhong, Min....?” sukot ni Jimmy kang Minda, ang iyang silingan nga katalirungan ug klasmeyt niya gikan sa elementarya og hayskol sa ilang baryo. Kamanghurang anak si Minda sa tulo ka managsuon.

“Oo, Jim! Lami kaayo ang sinugba ug linab-unang uhong. Mao sab ni ang sagad kong ibawon nga sud-an sa eskuylahan...!”

“Parehas gyud diay ta, Min! Unsaon, mga anak man god ta og kabus nga mga mag-uuma.

“Bitaw, Jim! Apan ang kakabus dili babag sa atong pagkab-ot og hataas nga kinaadman. Mag-self-supporting ta sa pagpadayon og eskuyla sa kolehiyo, Jim....!”

“Bitaw, Min! Payts ta bisag lupig! Aron dili na sinugbang uhong ang atong isud-an sa umaabot, kun dili litsong baboy na...!”

Mikilab ang katuigan. Human makagradwar sa hayskol, nanimpalad si Jimmy sa pagpanarbaho sa siyudad. Nag-gasolina boy siya. Nagsikyu. Mieskuyla siya matag gabii sa kolehiyo sa kursong Accountancy. Nakagradwar. Nag-review. Nikuha sa board exam. Nakapasar si Jimmy ug nahimo siyang usa ka CPA, nga nakatrabaho dayon sa usa ka dakong banko sa gobiyerno.

Nakuha siyang private accountant sa duha ka dagkong pribadong kompaniya sa Sugbo. Naharuhay si Jimmy. Nakapalit og house and lot sa usa ka subdivision sa siyudad. Napaayo sab niya ang kabiling balay sa ilang baryo nga iyang gipapuy-an sa iyang uyoan kay dugay nang mitaliwan ang iyang tatay Berto ug nanay Sidra. Sa edad nga 35, nagpabilin siyang ulitawo.

“Jimmy! Naay uhong...!”

Nahalingi si Jimmy sa nagsangit kaniya ning buntaga nga maoy nakasanta sa kutay sa iyang handurawan.

“M-Minda! Min, ikaw man diay...!”

“Oo, Jim! Nangita ko’g uhong...!”

Nagdungan sila’g pangatawa.

“Minyo na ba ang guwapang nars nga atua manarbaho sa America...?”

“Still single pa, Jim! Anhi nako mag-nars sa Sugbo...!”

“Parehas diay ta nga mga single, Min! Linga kos pagka-CPA!”

Nagkasugat ang ilang tinan-awan. Nagtinutokay sila. Dugay kaayo! (Kataposan)