Kwarta lang

Dear Tita Salie,

Maayong adlaw kaninyong tanan nga naa sa Banat News labina kanimo, Tita. Mangayo lang ko nimo og gamay nga panahon aron magpatabang ko niining akong problema karon. Dugay na gyod nako kining gidaladala apan karon pa gyod ko nakalugar sa pagpaabot diha kanimo.

Tagoa lang ko sa pangalan nga Ms. Cancer, 26 yrs. old, minyo. Ang akong anak usa ka babaye ug maoy mihatag kanako og kadasig karon.

Ang akong problema kabahin kini sa akong bana nga Muslim ug alagad sa balaod. Nagproblema ko niya kay nagbisyo man god siya, nangbabaye ang akong bana. Dili pa igo iyang gidala ang babaye ngadto sa among balay. Perti gyod nakong lagota. Busa nilayas ko sa among pinuy-anan ug akong gidala ang among anak. Ug aron makapangita ko og trabaho akong gibilin ang akong anak didto sa akong mama.

Ang kabit sa akong bana, Tita, dunay Amerkano. Matud pa sa akong bana nga kwarta lang ang iyang tuyo nganong gibuhat niya ang pagpangabit, apan wala ko motuo, Tita, kay magsige man siya og adto sa babaye. Nagtuo gyod ko nga nahigugma usab siya sa iyang kabit.

Karon, Tita gusto niyang kuhaon ang among anak. Madalidali ba niya og kuha ang bata bisan wala’y pagtugot kanako, Tita? Palihog pasabta ko. Thank you very much and more power.

* * *

Maayong adlaw,

Ingon gyod niini ang mga lalaki nga magbinuang, dali ra kaayo makakita og alibi. Nganong kinahanglan pa man niya nga mangabit aron makakwarta nga duna man siya’y trabaho usa pa mosugot lang ba siya nga iyang buhion ang iyang pamilya sa kwarta nga gikan sa iyang pagpangabit? Alagad man unta siya sa balaod dapat siya unta ang ehemplo alang sa mga maayong buhat apan siya na hinuon ang nag-una-una.

Bisan pa man kun Muslim siya apan dili kini igong rason aron puyde na siyang magdala og laing babaye ngadto sa inyong panimalay tungod kay dili ka Muslim. Klaro lang gyod kaayo nga wala na siya’y gugma kanimo. Tungod kay wala na siya’y respeto kanimo ug sa inyong kaminyoon.

Kun ako’y ikaw ayaw paglakaw, mas maayo pa siguro kun imo siyang isumbong sa ilang labaw aron mahatagan siya og sanction gikan sa ilang labaw.

Puyde usab nga imong isumbong ang babaye sa iyang Amerikano aron mahadlok kini ug maglikay na siya sa imong bana. -- Tita Salie