Biktima sa bag-ong ilad

Attorney, kun puede unta, moari ka’s amo sa baryo Beltera. Kay naay buyer sa yuta nga muari. Asawa’g foreigner. Dad-a ang mga papeles sa yuta. Kay kun makakita siya’s papeles, mobayad dayon. Nagkasabot na mi sa presyo” mahinamon nga pulong ni Peter Undal sa telepono. Gahinamhinam sab si Atty. Manny Agua nga naggunit sa telepono ning sayong kahapunon sulod sa iyang bupete sa baryo Cachivera. “Anus-a man muanha ang buyer sa inyo?” ni Manny, hugot ang paggunit sa telepono sa walang kamot. “Ugma. Alas nuybe sa buntag” ni Peter. “Sige. Moanha ko” ni Manny dayong butang sa telepono.

Dili matukib iyang kalipay kun matinood ning giingon ni Peter. Kay bayente ka tuig niyang kombate ining kaso sa yuta ni Peter. Nabiktima si Peter sa iyang ig-agaw nga mao untay unang mopalit ining yutaa niya sa Beltera. Sa presyo nga P500,000 giunahan lang siya og P40,000.

Nipirma siya’g acknowledgement receipt sa maong pasiunang bayad. Unya wa lang niya damha, nabalhin sa ngalan ni Pablo ang deklarasyon sa yuta. Pag-dig up ni Peter sa opisina sa Tasador, dunay narehistro didto nga deed of sale nga pinirmahan kono ni Peter. Gimadyik ni Pablo ang pirma ni Peter. Si Manny ang nilaban ni Peter batok kang Pablo.

Napildi sa kaso si Pablo sa RTC. Unya niapelar sa Court of Appeals. Daug gihapon si Peter. Wa na nipasaka si Pablo sa Supreme Court. Nahutdag bala. Contingent ang kaso ni Peter. Ang kondisyon nilang Manny, trayente porsento sa yuta o sa halin sa yuta ang attorney’s fees ni Manny. Naghinamhinam gyud si Manny nga makadawat sa iyang attorney’s fees.

Minus singko para alas nuybe sa buntag niabot si Manny sa balay ni Peter. En ponto alas nuybe pag-abot sa Nissan Navarra nga itom nga gisakyan sa buyer. Nagpaila ang babaye nga sekserika kuyog ang German niya nga bana. Siya si Lara. Iyang bana si Ian. Nanglingkod sila sa sala sa balay ni Peter. Nabasa ni Lara ang mga dokumento. Desisyon sa RTC nga nag-anular sa peke nga deed of sale pabor ni Pablo. Desisyon sa Court of Appeals nga nag-affirm sa desisyon sa RTC. “Okay. I just want to get hold of the Certificate of Finality of the Court of Appeals decision” ni Lara. Nag-iningles kay di man kasabot og Binisaya iyang bana. “And the moment I get hold of it, we will immediately pay in full the purchase price which is P3,000,000.00”.

Pag-abot balik ni Manny sa iyang bupete, gitrabaho dayon niya ang motion para sa Court of Appeals, aron mapagawas ang Entry of Judgement o Certificate of Finality. Gihatag dayon niya ni Peter ang Certificate of Finality paggawas sa pagkasunod bulan.

Gitawag na lang siya ni Peter sa telepono nga nipirma siya’g kontrata tali nilang Lara kay nibayad og down payment nga P200,000 ang naulahi. “Dili unta ka angay mopirma og deretso. Imo unta kong gipabasa sa dokumento. Nailad na baya ka’g kausa. Basi’g mailad sab ka’g usab ron” ni Manny dalang kahiubos sa iyang kliyente. “Gusto na man siyang magbalay dayon sa yuta. Unya iya man kong himuong caretaker sa yuta bisa’g dili na akoa” ni Peter.

Nakapanghupaw si Manny. “Di ba mobayad man dayon si Lara sa full amount inig kadawat niya sa Finality?” ni Manny. “Daghan man sab og requirements iyang gisitar. Kinahanglan mabalhin kono una sa ngan nako ang deklarasyon. Hasta ang record sa DENR kinahanglan ipabalhin sa akong ngan” ni Peter. “Di na ni mao. Biktima na sab ka’s bag-ong ilad” ni Manny. “Niingon man lang siya layo imong bupete” ni Peter.

“Dad-a nang mga papeles diri kay akong basahon. Kay nagduda ko nga way kuwarta nang bayhana. Kay kun may kuwarta pa nang bayhana, nituman na sa iyang saad. Kanang iyang gihimo ron, langanlangan. Mas maru pa nang Pablo bayhana” ni Manny.

Pag-abot ni Peter, naghimo dayon siya’g demand letter ngadto ni Lara. Nga sulod sa napulo ka adlaw gikan sa pagdawat sa sulat, kinahanglan mobayad dayon siya sa balance sa presyo. Kun dili, forfeit iyang down payment ug mangita’g laing buyer si Peter. Napugos og bayad si Lara kay hapit kulataha sa German. Kay dugay na diay’ng gihatag sa German ang para bayad. Unya gipatubo pa sa banko. (Kataposan) (Kadtong magbabasa nga gusto’g libreng konsulta, dad-a ning pahina sa sugilanon sa opisina sa tagsulat. Iatol og Sabado sa buntag)