Salamat sa Baha

Gula 4

Misirit lang ang taksi nga gisakyan nila ni Dennis ug Lovely. Wala madugay nahiabut sila sa dapit nila ni Lovely – sa Guadalupe. Gisubay nila ang gamay’ng dalan-dalan paingon sa sudlonon nga bahin nga daghan ang kabalayan. Ngiob na ang palibot kay alas siete na sa gabii. Hangtud nga didto sila musangko daplin sa sapa.

“Mao ni ang among pinobre nga balay Dens nga nahimutang daplin sa Guadalupe river,” matud ni Lovely dihang mitangka na sila niadtong dili kaayo daku nga balay nga hinimo lang sa mga ordinaryo nga kagamitan.

“Dali, sulod Dens,” timbaya ni Lovely. Dunay usa ka hamtong babaye nga miabot nga mora’g gikan sa silingang balay. “May bisita ka man diay Lovely. Giingnan ko sa atong silingan nga may kauban ka,” matud sa inahan ni Lovely.

“Ma, mao ni si Dennis. Gitabangan ko niya ganina ma sa pagkanaug sa jeep didto sa Colon kay pwerteng lawma sa tubig-baha. Kun wala pa ko niya tabangi, basa g’yud unta kaayo ang akong sapatos og medyas,” ni Lovely pa.

Nahinangop kaayo ang inahan ni Lovely. “Nangimbitar diay kadtong imong ig-agaw nga si Angie kay dili ka kuno niya makontak. Wala diay siya nimo mahatagi sa bag-o mo nga numero?” matud ni Manang Lucing.

“Tuod da, nalimot diay ko pagpadala niya sa bag-o ko nga numero,” ni Lovely pa nga mikuot sa iyang selpon. “Unya, wala ra ba dinhi ang imong manghod nga makauban nimo sa ila ni Angie, gabii na ra ba,” mabalak-on ang inahan.

“Wala kay lakaw Dens, ubani ko sa balay sa akong ig-agaw kay birthday niya. Naa sa Kalunasan ang ilang balay duol sa Boys Scout headquarters gani,” matud ni Lovely.

Wala gayud mag-usik og higayon si Dennis, gitangdo dayon niya si Lovely. “Sige, adtoon nato ang imong ig-agaw. Mag-agi usa ta’g birthday gift para niya.”

“Ang problema Dong kay walay budget si Lovely nga ikapalit og gift sa iyang ig-agaw,” matud ni Manang Lucing.

“Ako’y bahala Manang… dia pa ko’y kwarta. Maayo nga malipay ang ig-agaw ni Lovely nga makaingon nga naghuna-huna kining gwapa niya nga ig-agaw,” matud ni Dennis nga nagpahiyom.

Human makailis si Lovely, nagdali sila nga mibiya aron dili pa masirad-an sa department store. Misakay na usab sila’g taksi paingon sa Ayala. “Maikog na kaayo ko nimo Dens uy,” matud ni Lovely. (Sumpayan)