Maayo pay wala

Dear Tita Salie,

Maayong adlaw kaninyong tanan nga naa sa Banat News ug sa tanan nga tigbasahan niining maong pahayagan, ug labina kanimo, Tita, nga maoy tigtabang kanamo nga dunay mga suliran. Manghinaut ko nga dili ka mapul-an sa imong gimbuhaton kay dako kaayo ka og tabang sa uban labina sa atong mga kabatan-onan karon.

Tagoa lang ko sa ngalan nga Girlie, medyo may edad na, minyo na ko, Tita, ug dunay 3 kabuok mga anak. Ang akong problema kabahin kini sa akong bana nga wala’y trabaho kay miundang man siya. Nigawas ang katapolan niya ug karon nahimong kugihan sa imnanan.

Pero, since sa bag-o pa ming minyo mao na gyod kini ang iyang batasan wala gyod mausab hangtud karon. Grabe ka palaaway, bisan wala’y igong hinungdan mokalit lang og yawyaw, mangasaba, manumboy, manungo, tanang klase sa tungo ako na nga nadawat ug nadunggan gikan kaniya.

Ako lang ang nagtrabaho namo, Tita. Ug inig abot nako gikan sa work ako pa ang maghikay sa pagkaon, mag-atiman sa mga hayop namong gibuhi, mag-asikaso sa mga anak, laktod nga pagkasulti mora ko og maid. Mao nga usahay makaingon ko nga mas maayo pay wala ko’y bana kay pareho rang estoryaha ako tanang trabaho kay ang akong bana tua kanunay sa  imnanan. Gikapoyan na gyod ko sa akong kinabuhi, Tita. Unsa kahay maayo nakong buhaton? Palihog pasabta ko.

* * *

Maayong adlaw,

Ako, personally, maglagot gyod sa mga bana o amahan nga badlongon labina kun ilang gipasagdan ang ilang asawa nga maoy naningkamot aron mabuhi ang pamilya. Asa na man ang ilang titulo isip padre de pamilya. Sila ang head of the family, so dapat lang unta nga sila usab ang mokayod ug maayo ug ilang barogan ang katungdanan nga ilang gipanumpaan. Apan daghan na kaayo ang mga bana karon nga mao na hinuoy nagpabuhi sa ilang mga asawa. Dili ba kita maulaw niini? Maayo lang unta kun niabag sila sa mga trabaho ug wala magpabadlong.

Tungod sa atong gugma sa atong pamilya makalahutay ta sa maong sitwasyon. Pero dili gyod kalikayan nga moabot ang panahon nga mapuno ug maluya ta. Makasabot ta sa sitwasyon nga mora og kita na lang usa ang maglihok ug gipasagdan ta sa atong bana. Mao kining panahona nga lami kaayong i-back-out ug i-file og divorce. Apan tungod lagi sa gugma ang asawa ug inahan mopadayon lang sa unahan.

Kun dili na madala og amoral ang imong bana, bisan tanang hangyo ug  parayeg nabuhat mo na, ingna ang imong mga anak nga sila ang mosulti ngadto sa ilang papa. Siyaro na man kun dili siya maulaw nila. Pero ikaw una ang mosulti kaniya kay tingali diay kun kuwang lamang siya sa imong kablit ug kuhit. -- Tita Salie