Pagbugtaw sa Damgo

Gula 48

“Karon pa gyud, Tiyo,” niya pa.

“Mao ba?” sa uyoan. “Kumosta ang imong lakaw sa Manila?”

“Maayo man Tiyo. Ug nia, dala na nako ang tropeyo.”

Gitunol niya ang tropeyo sa uyoan. Gidawat kini sa lagas ug giganid pagsuling. Namatikdan ni Melchor nga may kaham-ot nga miaslay sa mga ngabil niini.

“May ngalan kana gayod sa panulat, Metlong,” nagkanayon si Tiyo Tibur niya nga mibalik pagtunol sa tropeyo kaniya. “Ampingi kana. Usa kana ka bililhong bahandi nga labaw pa sa salapi.

Gidawat ni Melchor ang tropeyo. Nahimuot siya sa gisulti sa uyoan.

“Hain na man diay ang imong makinilya, Tiyo? Wala makapugong si Melchor. Natingala siya nga wala na ang makinilya ug ang lamesa nga gipatungan niini sa hawanan sa payag. Mao nay mipuli sa dapit nga nahimutangan niini ang duyanan.

Wala dayon motubag si Tiyo Tibur niya sa pangutana. Mibangon kini gikan sa duyanan. Mipaingon sa tamboanan. Giakmoy ang duha ka palad sa pasamano sa bentana ug milantaw sa lawod. Gisunod kini ni Melchor. -- Sumpayan pa