Pagbugtaw sa Damgo

Gula 46

“Congratulations sa imong pagdaog sa contest,” ni Laura pa.

“G-giunsa nimo pagkasayod?”

“Nakabasa ko sa pamantalaan. Mitambong man gani ko sa awarding. Wala ako magpakita nimo kay gidaog ko sa kaulaw. Nagpakisayod na lang ko kun kanus-a ka mopauli. Nagsusi ko sa tanang lukatanan og tiket sa barko maong nakuha nako ang imong schedule ug nagkasakay gyud ta.”

Wala motubag si Melchor. Gitalikdan niya si Laura.

“Nasayod kong nahiubos ka nako, Mel,” ni Laura pa. “Karon pa ko makaamgo sa akong sayop. Nahimo akong dawo sa gugma ko kanimo ug wala nako sabta ang imong situwasyon. Pasayloa ko sa akong nabuhat.”

“Wala kay angay pangayoan og pasaylo,” niya pa. “Wa ko ikaw basola sa imong gibuhat tungod kay nakaamgo ako sa dako kong pagkulang nganha kanimo.”

Wala’y tubag gikan kang Laura. Apan ang palad sa dalaga midapat sa abaga ni Melchor. Mihinay siya pag-atubang kang Laura. Nagkatagbo ang ilang mga tinan-awan.

Nasuta ni Melchor nga nagpabiling madanihon ang katahom ni Laura. Mao pa gihapon kini ang Laura nga iyang gihigugma kaniadto ug hangtod karon. Ang katahom ni Laura usa ka sugilanon. Si Laura mismo usa ka matahom nga sugilanon nga dili niya kabalibaran. -- Sumpayan pa