Pagbugtaw sa Damgo

 Gula 43

Maoy pagsugod sa tulomanon sa iyang pagsulod sa executive hall sa hotel diin didto ipahigayon ang kalihokan. Gisugat siya ni Gumer nga nakamatikod gilayon sa iyang pag-abot. Mipig-it kini sa iyang kamot isip pasiunang pahalipay sa ilang panagtabla alang sa unang ganti sa tigi sa sinulatay.

Wala siya makasabot sa lintunganay sa kakulba nga miduyan kaniya sa iyang paglingkod sa bakanteng silya tupad sa gilingkoran ni Gumer. Wala matuhog sa iyang salabotan ang gipanulti sa mamumulong niadtong tungora kay ang iyang hunahuna mikagiw ngadto sa dagat ug giduladulaan sa mga balod.

Miabot ang labing gikahinamang bahin sa tulomanon sa mga magsusulat -- ang pagpanghatag sa mga ganti. Dihay kapid-an ka mga alho nga milubok sa dughan ni Melchor. Ug dihang gitawag na gayod ang iyang ngalan sunod sa kang Gumer, daw may minilyon ka  mga tambol nga gibasal sa iyang kaugalingon. Mora siya’g naglutaw sa hangin samtang naglakaw sila si Gumer paingon sa entablado. Gisapwang siya sa hugyaw ug pagakpak sa mga tawo nga nanambong sa seremonyas.

Nagdungan sila si Gumer ug Melchor pagsaka sa entablado, gisugat sila sa usa ka maanyag nga babaye. Gisab-ongan sila og garland. Unya gitunol kanila sa tagsiya sa kalihokan ang ilang mga ganting salapi ug tropeyo. Gitagsatagsa paglamano ni Melchor ang mga sakop sa hunta sa mga maghuhukom ug tigpasiugda sa tigi. Wala na siya makaalinggat kun unsay gibuhat ni Gumer. -- Sumpayan pa