Ang palakero Gula 5

Dali ra kaayo nga miabot si Dennis sa ospital nga gidad-an sa iyang anak. Dili na unta siya pasudlon sa gwardya nga nagbantay sa main entrance kay gabii na ug dili na ting-bisita.

Dugay si Dennis nga nakasulod ug nagpaminti siya sa kasuko ngadto sa gwardya. Diha pa siya pasudla dihang gikontak sa mga personnel sa information si Lorelei ug nakonpirmar nga amahan si Dennis sa pasyente.

Kahilakon si Dennis nga nagsud-ong sa iyang anak. Kwarenta na lang ang platelet niini ug giabisohan na gani si Lorelei sa doktor nga mag-andam na lang og donor sa dugo kay aron magamit dayon kun kinahanglan ang pag-abuno.

"Giingnan ko sa doktor nga kun mous-os pa gani ang platelet sa bata abunohan na g'yud siya'g presko nga dugo," matud ni Lorelei nga may kabug-at ang tuno sa tingog kay nahiubos sa iyang bana nga karon lang mipatim-aw.

"Diin ka man sukad ganina. Sayo ka nga migawas sa opisina ug dili ka motubag nga gikontak tika sa makadaghang higayon," pintok ang tingog ni Lorelei. Wala motubag si Dennis.

Sa hilom nakonsyensya si Dennis. Nakapanglingo-lingo siya ug daw kahilakon. Dayon mikitab-kitab ang iyang mga ngabil samtang nagsud-ong nga walay pupamilok sa dagway sa iyang anak nga natulog ug naghigda sa katre sa ospital.

"Adtoon usa nako kun may result na ba ang laboratory test. Maayo unta og misaka na pagbalik ang iyang platelet," ni Lorelei pa nga mibiya paingon sa nurses station.

Pagtalikud ni Lorelei, wala na gayud mapugngi ni Dennis ang paghilak. Gigakus niya ang iyang anak. "Sori kaayo dong, sori kaayo."

Naabtan siya ni Lorelei nga nahibalik dayon. "Unya kumusta? Misaka na ba pagbalik ang platelet sa bata?" naghinam-hinam si Dennis sa tubag sa iyang asawa. "Forty seven na tawon, misaka na og gamay," matud sa asawa.

Gigakus ni Dennis ang iyang asawa tungod sa kalipay. Nasayud man gud si Dennis nga kun ang platelet mobalik na gani sa pagsaka, diritso na kini ug dili na mobalik pa sa pag-ubos.

Gusto unta ni Dennis nga isaad nga magbag-o na siya sa iyang pagkatawo. Gusto unta niya nga talikdan na ang pagka-palakero, apan dili pa niya kini mahimo.

Wala motrabaho si Dennis pagka-ugma kay giatiman niya ang iyang anak. Wala kaayo sila magdugay sa ospital ug nakagawas ra ang bata.

Pagbalik ni Dennis sa trabahoan, giduol siya ni Jinky. Nahinumdom siya nga gisaaran man diay niya kini nga hatagan og P500 kun makakita kini'g batan-ong chicks nga makigdeyt kaniya. (Sumpayan)