Pagbugtaw sa Damgo

Gula 4

Mitindog siya. Human ikasambilay ang bag nga gisudlan sa iyang mga sapot, migawas siya sa kan-anan. Milakaw subay sa aseras.

Apan naignat siya. Mitingkag ang iyang mga dalunggan pagkadungog sa tiliis nga tingog sa usa ka babaye. Nahalingi siya sa iyang luyo. Mibantang sa iyang mga mata ang usa ka salida. May babaye nga nangayog pakitabang samtang migukod sa lalaking nagdagan nga nagbitbit og bag. Ang iyang hunahuna kadali rang nakahatag og kahulogan sa pasundayag nga nakita. Ang babaye nabiktima sa lalaki nga kagawon og kamot.

Nakapanglingo si Melchor. Mao diay kini Manila? Nakasukot siya sa iyang kaugalingon. Nakangislo siya. May kabidli nga misungag sa iyang ginhawaan samtang naghunahuna sa iyang nasaksihan karong buntaga.

Gikuot niya gikan sa bolsa sa iyang polo ang gamay’ng piraso sa papel nga gisuwatan sa adres sa iyang ig-agaw dinhi sa Manila. Iya kining gibasa. Unya mitawag siya’g taksi ug nagpahatod sa maong adres.

Nahimong multo si Melchor sa mga mata ni Victor pagkakita niini kaniya. Natugkad niya ang gibati sa iyang ig-agaw. Wala kini magdahom sa kalit niyang paghitungha. Apan may labok sa kahinangop nga milibakag sa pamayhon sa iyang ig-agaw sa iyang paghibutho sa gipuy-an niini.

Nagkumustahay sila. Iyang gipasabot ang iyang ig-agaw sa iyang katuyoan sa Manila. -- Sumpayan pa