Ang palakero

Gula 2

Mitindog si Dennis ug giubanan siya ni Jinky paingon sa visitors’ waiting area. “Leny, meet Dennis. Amiga nako siya Dens, si Leny. Biyaan ko usa mo ha?” paila-ila ni Jinky kang Leny ug mibalik kini sa iyang pwesto.

“Glad to meet you Leny. Can I invite you to a dinner after my work?” smiling si Dennis nga milamano ni Leny nga nagpahiyom ‘sab kaniya. “Sige, may tiwason lang ko nga gamay na lang g’yud kaayo sa akong gitrabaho, unya manglakaw na ta,” matud ni Dennis.

Alang kang Dennis wala gayud masayup si Jinky kay sa una pa lang gani niya nga pagkakita ni Leny, daw nagtubod na ang iyang laway. Porma kaayo ang mga ngabil sa dalaga, lamurok ang iyang mga aping ug tag-as ang pilok nga dili artipisyal.

Gipunit ni Dennis ang telepono diha sa iyang lamesa. “Hello Jinky, wala ka gayud masayup sa pagpili ni Lenny, she is very charming and pretty. But, kadtong atong gikasabotan, oki ba siya?” buot lang siguroon ni Dennis si Jinky.

 “Yes Dens, ako na nga gi-brief si Leny ug misugot ra kay ako man ‘sab giingnan nga buotan ka ug makatabang kaayo niya,” matud ni Jinky. Dali ra kaayo nahuman ni Dennis ang iyang trabaho. Gisulod dayon niya sa bag ang iyang laptop ug nagdali nga mipaingon sa nahimutangan ni Leny. “Tana Lens.”

Pagtindog ni Leny, nakabantay si Dennis nga ang iyang mga kauban sa trabaho pwerteng nakatutok sa dalaga. Naghunghongay ang mga kauban ni Dennis nga klaro kaayo nga siya na ang gilibak. Nahilum ang iyang mga kauban dihang migawas na sila sa opisina.

Misamot pagtubod ang laway ni Dennis kay nabantayan niya nga may pagka mahinhin si Leny. Kini maoy gusto niya sa usa ka babaye. Daw dili siya makatoo nga mosugot si Leny nga makigdeyt kaniya nga karon pa sila magkaila.

“Duna ka diay awto?” matud ni Leny dihang giyawihan na ni Dennis ang pultahan sa kotse nga giparada atubangan sa ilang opisina. Wala motingog si Dennis. “Tig-apilan ka diay og mga beauty contest Len?” matud ni Dennis dihang ang kotse misugod na sa pagdagan.

“Usahay, lingaw-lingaw lang gud,” dali nga tubag ni Leny. “Maayo kay dili ka mauwaw nga daghan man ang magtan-aw Len. Dagku ba ang madawat ninyo nga premyo?” laing pangutana ni Dennis.

“Gagmay ra g’yud kaayo. Sa una, mauwaw ko pero naanad na lang kay ingon ana man ‘sab ang himoon sa uban nga mosalmot sa beauty contest,” pasabut ni Leny.

“Mosugot ka ba Lens kun motan-aw ko nimo nga mora’g mosalmot sa beauty contest. Ako ang mohatag nimo’g premyo nga P3,000?” matud ni Dennis. (Sumpayan)