Ang ulahing pasumbingay

Ako ang tourist guide sa Crocodile Red, usa ka lugar-suroyanan sa mga yanong probinsiyano ug sa mga turista nga mahiligong motan-aw og talagsaong mga buaya.

Akong kauban dinhi si Zards ug siya ang tigpakaon sa mga buaya. Sama nako, stay-in usab si Zards sa Crocodile Red.

Yano nga pagkatawo ug hilomon kaayo si Zards. Daghang anib sa iyang kinabuhi diin nagpahipi ang mga butang nga para niya angay lang magpabiling sekreto. Ug maong puno sa misteryo ang pagkatawo ni Zards, maoy akong pangagpas.

Nauna lang ko’g duha ka tuig ni Zards sa pagpanarbaho dinhi sa Crocodile Red. Sa ngadto-ngadto nasuod ko siya pag-ayo ug mihatag og dakong pagsalig kanako. Ako ray bugtong gitug-anan niya sa mga sekretong anib sa iyang kinabuhi.

Usa ka gabii, samtang nagpahulay ko’s akong payag halayo lama’g diyotay sa nahimutangan ni Pangil, ang kinadak-ang buaya sa Crocodile Red, kalit lang mingtumaw si Zards. May bitbit siyang usa ka long-neck nga Tanduay.

“Mag-inom ta, Sol,” matud niya sa pugos nga pahiyom. “Imong ambit ang sumsoman, ha?”

Taliwa sa among kahubog may mga gipanug-an si Zards. Diha pa nako hisayri nga usa diay siya ka polis kanhi ug may ranggong sarhento.

“Gipapha ko’s serbisyo, Sol. May giatubang kong kaso. Tingalig mabalhog na ko’s bilanggoan sa sunod semana kay pagabasahan na ko’g desisyon sa RTC. Temporaryo ra kong nanarbaho dinhi, temporaryong kagawasan.”

“Unsa diay imong kaso, Zards?” sukot ko nga may sagol-kahibulong.

Giagi niya’s pasumbingay ang iyang tubag dungan sa pagbaling sa panan-aw ngadto sa nahimutangan sa kinadak-ang buaya.

“Manunukob gyud na’s Pangil, Sol. Hakog. Kapila na nako pakan-a apan wala’y kabusgan. Hakog gayod pag-ayo. Ang gusto mao nga mabulahan kanunay, kaugalingon day gihunahuna.”

Ug kalit siyang mihilak, midanguyngoy.

“Gibiyaan na ko’s akong asawa, Sol. Mao ra sab siya’g si Pangil. Manunukob. Kaugalingon day gihunahuna.”

Sa tumang kahubog, nahikatulog na diay ko nga wala makahimungawong. Sa akong paghigmata, akong nakita ang usa ka gamay’ng sulat nga gibilin diha sa salo’g nga kawayan.

Ako unang pakan-on si Pangil, Sol. Gusto niya’g bag-ong karne.

Akong gipangita si Zards. Nagsusapinday ko sa kahubog hangtod nga nahiagi sa nahimutangan ni Pangil.

Nakita nako si Pangil nga nagkadugo ang baba. Naingog tawo nga nagpanig-ab sa tumang kabusog.

Akong naisip si Zards. Akong naisip ang iyang asawa. Akong naisip ang giingon niyang sunod semana sa RTC.

Ug kalit akong nakahilak. (Kataposan)