Ang palakero

Gula 1

Grabe kapalakero si Dennis kay bisan og minyo na siya ug gwapa ang iyang asawa apan lainlain lang gihapon ang mga babaye nga iyang ikauban ug dad-on sa mabugnaw nga dapit.

Ang nakalahi ni Dennis sa ubang lalaki mao nga dili siya gusto nga makigrelasyon og babaye. Gusto niya nga kana rang gitawag og “tuhik-tuhik” nga maayo lang og magkita, maayo usab og dili.

Dugay kaayo siya nga nasakpan sa iyang asawa sa iyang kabuang kay wala may babaye nga manawag o kaha mo-text kaniya kay dili man niya hatagan og contact numbers sa iyang selpon. Daku og sweldo si Dennis sa iyang gitrabahoan mao nga dili problema alang kaniya kun mokuha og mga batan-ong chicks, ilabi na kadtong nanginahanglan og kwarta. Dagku usab siya og hinatagan mao nga sagad mokubit g’yud ang mga “disi” nga edad kaniya.

Ning hapona, gikan si Dennis nga nagkuha sa iyang payslip. Kay wala lagi siya’y mga loan, daku kaayo ang nahabilin sa iyang sweldo bisan og giibanan na kini sa mga deductions. “Maayo ka pa Dens kay daku pa kaayo ang subra sa imong sweldo,” matud ni Jinky, ang mahuyang nga kauban niya sa trabaho.

Mipahiyom si Dennis. Gitutokan niya ang mahuyang nga klaro kaayo nga naproblema sa budget. “Tabangan ko ikaw nga maka sideline,” giingnan ni Dennis si Jinky. “Unsa na Dens, sige bi tabangi ko nga makakwarta,” nagpakisayud.

"Dili ba active ka man sa mga beauty contest? Wala ka ba’y nailhan nga mga gwapa nga sagad tig-apilan sa mga beauty contest nga pwede nako nga ika-deyt? Mobayad ko bisan P3,000 unya ikaw, hatagan nako’g five hundred pesos,” ni Dennis pa.

Nahinangup kaayo si Jinky. “Sige Dens, teksan nako si Leny. Gwapa kaayo ni si Leny ug paminaw nako mokubit ni sa imong tres mil Dens. Karong taud-taud ako kang hatagan og feedback.”

Samtang didto sa iyang lamesa, nakadawat si Dennis og text message gikan sa iyang asawa nga si Lorelie. Nagpahibalo kini nga dad-on niya ang ikaduha nilang anak sa doktor kay taas ang hilanat. “Ibilin ra nako ang usa ka bata sa atong helper,” ni Lorelie pa.

Mo-text unta og reply si Dennis apan kalit nga mibutho si Jinky sa iyang luyo. “Dens, okey si Leny nga makigdeyt nimo, moari siya karong taud-taud, ako ray iyang pangitaon,” matud sa bayot. Gipaspasan ni Dennis ang paghuman sa iyang trabahoon. Nakalimot na lang si Dennis pag-reply sa iyang asawa. Taud-taud. “Dens, dia na si Leny, kanang mubo kaayo’g sinena nga naglingkud sa visitors’ waiting area,” matud ni Jinky. (Sumpayan)