Dukirok (Gula 5)

Sa unang higayon nagkasinabot ang masi’g ka pagbati nila ni Joy ug Tacio. Nagginaksanay silang duha ug ila na lang gani nga gibaliwala ang daghang kwarta nga diha sa ilang tupad.

“Kabuang g’yud nako uy, nakigparayganay man dayon ko nimo Tass nga wala gani ko masayud kun gawasnon ka pa ba. Dili ka pa ba minyo Tass?” may kabalaka ang tingog ni Joy.

“Ulitawo pa ko Joy uy. Tukma kaayo ang atong panagkaila kay bag-o pa mi nga nagkabuwag ug ang akong girlfriend,” ni Tacio pa nga mihatag og dugang kadasig ngadto ni Joy.

Apan dunay nakahasol sa kaisipan ni Joy. “Unya andam ka ba nga magpakasal nako nga byuda man ko Tass? “

Wala makapugong sa pagpahiyom si Tacio. Milugmaw ang luha sa mga mata ni Joy nga nakakita nga gibaliwala ra ni Tacio ang iyang kabalaka.

“Uy, nganong mihilak ka man Joy? Andam ko nga magpakasal nimo uy kay bisan og byuda ka apan mora ka man lang gihapon og wala mahilabti,” matud ni Tacio.

“Tinuod ka?” matud ni Joy nga miparayeg kang Tacio. “Apan nahasul ko sa giingon nimo kaganina nga maputol ang akong pensyon kun maminyo ko pag-usab,” giingnan ni Joy si Tacio.

Naghinuktok makadiyot si Tacio. “Mao na ang risgo diha Joy kay kun mahibaw-an nga naminyo ka pag-usab, putlon sa SSS ang pensyon sa imong bana para nimo.”

Nahibaw-an nila nga matag buwan dul-an sa P20,000 ang binuwan nga pension ni Joy. “Ah, unya ra nato kana hisgutan Joy kay naputol na hinoon ang atong pagparayganay tungod sa maong isyu.”

Gipadayon nila ni Tacio ug Joy ang mainitong pagparayganay. Wala gayud sila makapugong sa ilang mga pagbati. Nagkainit pag-ayo ang ilang pagparayganay ug hangtod nga gitagay nila ang talagsaong kalipay.

“Daan pa g’yud ko, bisan og usa ka na ka byuda Joy apan mora lang gihapon ka og dalaga nga wala maunsa,” nagngisi si Tacio nga nangomedya ni Joy. “Saba diha uy, bugal-bugal ay,” gikusnit ni Joy ang kilid ni Tacio.

Gilili nila ni Joy ang gawas sa balay. Hapit na motikyup ang kagabhion ug diha sa gawas ang mga tabian nga mga silingan ni Joy.

“Unya na lang sa gabii pauli Tass kanang wala nay tawo kay aron dili ko sumsoman nila’g tabi kun makit-an ka nga dia sa balay,” giingnan ni Joy si Tacio. Tuod, gitagbaw pa nila ang ilang kaugalingon pinaagi sa pagsubli-subli sa ilang pagparayganay. (Sumpayan)