Pagbugtaw sa Damgo (Gula 33)

Gipadala ni Melchor ang iyang sugilanon ngadto sa buhatan sa CCP agi’g sanong sa awhag sa iyang uyoan pagsalmot sa tigi sa sinulatay. Dili taas ang iyang panglantaw sa pag-apil sa tigi. Ang iyang pagsalga usa lang ka pamasin. Wala’y mawagtang kaniya kun dili siya makadaog. Ang iya usa lang ka pagsulay.

Milunga una si Melchor sa pagpakiglayog sa makinilya. Gihatagan niya’g pahulay ang iyang kaugalingon human sa makutas niyang pag-ugmad sa obra nga iyang gisalmot sa tigi. Gihatagan niya’g panahon nga makapanghimudlay ang iyang utok.

Tibuok adlaw siyang wala mogawas sa balay. Maoy iyang gihimo ang pagpamati sa lunsay’ng mga awit Binisaya, pagsubli’g basa sa karaang mga hulad sa Bantayog ug uban pang mga basahon.

Nianang pagkahapon mitan-aw siya’g balita sa telebisyon. Maduloton siyang namati sa taho sa mga tigbalita. Buot niyang tuhugon sa lantip niyang salabotan ang tanang gisulti niini. Dihang miabot ang panahon pagsibya sa kinaham niyang balita sa paugnat sa kusog, gipugngan niya ang iyang gininhawa. Init kaayo ang balita bahin sa boxing. Napilde sa unang higayon sulod sa 60 niini ka away si Kid Adolfo, ang giilang undisputed junior middle weight champion sa tibuok kalibotan. Gihubaran si Adolfo sa iyang bakos ni Gerry Vorapin, usa ka batan-on ug nobatos nga challenger nga wala pay ngalan sa kalibotan sa pamoksing. -- Sumpayan pa