Hay! Ang mga batan-on

Wa pay usa ka bulan nga guidance counselor si Dindo sa national high school sa lungsod sa Turandot. Unya nasulayan dayon iyang abilidad sa pagmaymay sa mga estudyanteng badlungon. Nia sa atubangan niya sa iyang lamesa sulod sa iyang buhatan sila si Bridgette ug Charlene.

Nanagminghoy sila nga naglingkod sa atubangan ni Dindo. Nag-away ang duruha ug gipa-report sila sa ilang class adviser sa 3rd year high school nga si Mrs. Esplana ngadto ni Dindo.

Matag karon ug unya maglalis ug mag-away ang duruha. Sila ang kinabrayitan sa ilang klase. Mag-ilogay sa first honors. Usahay si Bridgette ma-first. Usahay sab si Charlene. Ug kinamalditahan sab silang duha. Di magkaduol. Mag-inawayay. Mag-insultuhay. Kulang na lang maglabnotay sa buho. Dili na sila dawaton sa classroom ni Mrs. Esplana kun way rekomendasyon ni Dindo.

Naglibog rong hapona si Dindo kun unsay isulti sa duruha nga nia sa iyang atubangan. Puro sila naggikan sa mga adunahan ug respetado nga mga pamilya sa baryo Papignol. Si Bridgette matahom ug madanihon og hitsura ug pigura. Si Charlene dili kaayo nindot og hitsura ug pigura. Gitotokan una niya tagsatagsa ang duha ka bisita. Nitindog siya. Nilakang padulong sa pultahan. Nanira ug nanarangka sa pultahan sa iyang buhatan.

Ulitawo pa si Dindo. 30 anyos ang edad. Way uyab daghang mga babaye nga manguna niya. Magpasabot nga may gusto niya. Pero wa lang niya hatagi’g importansiya. Kay kinamaguwangan siya sa lima ka managsoon. Patay na ilang mga ginikanan. Ug nisaad siya’s iyang mga manghod nga dili siya magminyo kun di sila kahuman og hayskul. Siya ang nagsuporta sa iyang mga manghod labi na sa ilang pagtuon.

Human sa taudtaod nga kahilom nakagaray si Dindo og mga pulong.

“Ayaw pagginarbusa ug pagminaldita tungod sa imong kaanyag. Kay ang imong katahom dili nimo hinagoan. Gasa na nimo gikan sa Kahitas-an. Dapat mapasegarbuhon ka sa imong maayong kinaiya kay nakat-onan na nimo ug ikaw ang nagpalambo niana,” ni Dindo ngadtong Bridgette nga iyang gitutukan pag-ayo. Niduko si Bridgette.

“Ikaw sab, ayaw kaguol ug ayaw paglagot kun nagtuo ang mga tawo nga laksot ka’g hitsura. Di na tinuod. Bunga lang na sa ilang ngil-ad ug dautang hunahuna nganha nimo ... Ang tinuod, hinimo ka, lalang batay sa imahe sa Diyos. Ug ang Diyos matahom ug ambongan” ni Dindo ngadtong Charlene. Niduko sab si Charlene. Di kaharong sa tinan-awan ni Dindo.

“Kamong duha, sama nako, tawo. Ang Diyos ra gyud ang angay maka-look down sa tawo. Busa, pagrespetuhay mo sa usa’g usa,” dugang ni Dindo.

Gibanosbanos og tutok ang duha.

“Ikaw Bridgette, dunay abilidad o nahibaw-an nga wa ni Charlene. Ikaw Charlene, dunay abilidad o nahibaw-an nga wa ni Bridgette. Busa, patas ra mo. Way labaw o ubos ninyo. Pagpinasayloay mo, paglamano. Ug sukad karon, higala na mo,” ni Dindo.

Nanindog ang duha. Mapahiyumon. Nag-atubang. Naglamano. Naggakos.

Nahimuot kaayo si Dindo nga nisaler iyang tambag. Mapasergarbuhon sa iyang kaugalingon.

“Girls, thank you for coming. Go back to your classroom. I’ll just send a note to Mrs. Esplana to admit you back to her class” ni Dindo pagkataudtaod.

Unya giatubang siya’s duruha.

“Nagdrama lang bitaw mi’g away-away, sir. Aron mi maka-meet nimo”, nagdungan ang duruha nga naghikohiko.

“Butangi!” nakatuaw sa hilom si Dindo. “Please girls. Concentrate in your studies,” ni Dindo nga nitindog ug ni-escort sa duha ngadto sa pultahan.

Paggawas sa duha nakapanghupaw si Dindo. Nangluspad siya’g gipaningot. Kay tsiks ra bay hinungdan nga nataktak siya’s eskuylahang iyang unang gialagaran. Natental siya’g estudyante. Di na siya gustong matental pag-usab.

 “Hay! Ang mga batan-on karon!” nakatuaw siya. (Katapusan)