Dukirok (Gula 2)

“Nakaila lagi ka nako sir?” nahibulong si Joy nga gisangpit ang iyang ngalan ni Tacio nga wala man unta siya magpaila.

“Dili ba miingon ka man nga asawa ka sa namatay. Gitan-aw nako ang nalista nga ngalan sa asawa sa namatay ug dia diri Joy,” pasabot ni Tacio. Naghimo-himo og rason si Tacio aron ipatoo kang Joy nga dunay problema ang iyang dukomento. Apan gipasaligan siya ni Tacio nga tabangan. “Sagdi lang, ibilin lang kining imong mga papeles kay ako ray bahala ani.”

Gipangayoan dayon ni Tacio og contact numbers si Joy. “Uy, udto na man diay, magdungan ta’g lunch sa kan-anan diha sa unahan .” Wala gayud makabalibad si Joy kay maayo man usab nga nakigsulti si Tacio.

“Palihug baya sir ha, tabangi ko nga madali og lusot ang akong claims ug ang lump sum pension,” daw nagpakilooy gayud si Joy. “Ayaw kabalaka, daghan na ang akong natabangan nga wala gayud magmahay,” ni Tacio pa.

Gitrabaho g’yud ni Tacio ang mga dukomento ni Joy. Ang tinuod, walay problema ang maong mga dukomento mao nga dali ra kaayo kini nga naaprobahan. Pagka sunod adlaw, giadto ni Tacio ang balay ni Joy basi sa address nga nabutang sa iyang dukomento.

Lapas sa alas sayes sa gabii na nga miabot si Tacio sa balay ni Joy. “Hala! Gipakalitan man ko nimo sir Tass,” matud ni Joy nga mauwawon nga miabi-abi ni Tacio. “Ayaw na lang ko tawga og sir uy, Tassy na lang,” matud ni Tacio.

“Dali, sulod sir. Gibisitahan ‘sab ko sa akong mga silingang-babaye,” ni Joy pa nga mitimbaya ni Tacio. “Maayo gani Joy kay nakakita ka’g amigo nga makatabang nimo nga dili ka maglisud pagkobra sa pensyon sa imong bana,” matud sa usa ka silingan ni Joy.

Layo kaayo ang deperensya sa pangedaron nila ni Joy ug sa iyang bana. Byudo na ang bana ni Joy dihang sila nagkaila. “Ayaw kabalaka Joy kay nahuman na nako’g andam ang mga papeles sa pensyon sa imong bana. Basin mapirmahan na kadto sa manager ugma,” ni Tacio pa.

Nasabtan ni Tacio nga gibati’g kalipay si Joy pagkadungog sa iyang gisulti. Gipalipay pa gayud ni Tacio ang batan-ong byuda. “Daku-daku g’yud kadtong imong kubrahonon Joy.”

“Mao ba Tass? Pila g’yud kaha sa imong kwentada?” daw mahinapon nga nagpaabot si Joy sa tubag ni Tacio. Mitukar na usab ang kaabtik sa chicks ni Tacio. “Tug-anan tika basta mosugot ka nga manguyab ko nimo,” matud ni Tacio. (Sumpayan)