Taudtaod gayod nga naghugdong si Jaymart, diha sa iyang nahimutangan sa sulod sa dakong hawanan sa unibersidad nga iyang gitunghaan. Nga diha mahimutang, sa kinatung-ang bahin sa Metro Cebu. Gikan man god siya sa opisina sa dean sa Teachers College, kay mitan-aw sa talaan sa mga estudyante nga mogradwar, nianang kataposang semana, sa buwan sa Marso, tuig 2010. Duna man goy gipapilit nga talaan sa estudyante nga mogradwar, sa may bulitin bord. Sa sulod sa opisina sa dean.
Nagsigi na lang gyod og hinuktok si Jaymart niadtong tungora samtang naglingkod siya sa taas kaayong lingkoranan nga gibutang simpig sa bongbong haduol sa opisina sa dean.
Wala gyoy kasayag ang iyang hitsura niadtong higayona. Ug morag lawom kaayo ang iyang gihunahuna. Gani, milakra kaayo ang dakong kasub-anan diha sa iyang panagway. Dako man god ang iyang problema.
Naproblema man god siya si Jaymart kun unsaon niya sa pagpasabot unya ang iyang mga ginikanan kun nganong dili siya makagradwar nianang kataposang semana sa Marso. Naglaom ra ba gayod ang iyang mga ginikanan nga makalampos gayod siya sa iyang pagtuon. Ug mahimo usab siyang usa ka magtutudlo.
Nahibaw-an man god ni Jaymart nga usa siya sa dili makagradwar nianang umaabot nga tingtapos sa klase. Kay wala man didto sa talaan sa mga estudyante nga mogradwar ang iyang ngalan.
Ning tungora morag giabot og dakong pagbasol si Jaymart. Giangkon man sab niya nga siya gayod maoy sad-an kun nganong dili siya makagradwar. Wala siyay laing mabasol kun dili ang iya ra usab nga kaugalingon.
Siya ra man goy nagbinuang sa iyang pagtuon. Wala man god siya magtinarong sa pag-eskuwela. Nabuang man god siya sa pakigbarkada. Sa pakighugoyhugoy sa uban usab nga mga batan-on nga sama kaniya.
Kaniadto god sa nagsigi pa ang klase inay sila mosulod sa ilang mga klase atua hinuon mopaingon sa mga internetan. Ug dili ba adto sa mga imnanan. Nga naghitak usab pag-ayo diha sa sulod sa dakbayan.
Maayo lang gani og makasulod siya si Jaymart sa iyang mga klase, makatulo sa kada semana. Kay ang iyang nawong tua na man lang kanunay sa mga nagkalainlaing kalingawan. Kuyog sa iyang mga barkada nga pulos usab mga estudyante.
Gani, kadaghanan na sila ipatawag sa opisina sa dean. Ug kanunay gani silang gimaymayan. Giprangkahan pa gani sila sa dean nga kun dili gayod sila magtinarong sa ilang pagtuon dili gayod sila makagradwar. Ug natuman gayod ang gibahad sa dean kanila. Kay dili man gyod sila makagradwar.
Sa tanto niyang paghinuktok mora nag kahilakon si Jaymart. Giabot na man god siya’g pagbasol sa iyang nabuhat. Sa wala niya pagtinarong sa iyang pagtuon. Sa kanunay niyang pagbinuang samtang nagsigi pa ang ilang klase.
Ug morag karon pa siya makamatngon sa dakong sayop nga iyang nahimo. Nga mao hinuon ang hinungdan kun nganong dili siya makagradwar. Ug dili na matuman ang iyang pangandoy nga mahimong usa ka magtutudlo. Sama sa iyang mga ginikanan. (Kataposan)