Tungod sa Uwan

Gula 5

Sa pangedaron ni Loloy nga 25-anyos na, ingon sa giandam na niyang daan ang iyang kaugalingon nga dili siya sugton ni Jane.

Pag-abot ni Loloy sa iyang gipuy-an, giteksan niya si Jane. Sa tulo niya ka sunod-sunod nga text messages, gipasabot ni Loloy si Jane ngano nga mibati siya’g gugma kaniya. Apan wala gayud siya makadawat og reply gikan sa dalaga.

Daw inanay’ng naluya si Loloy. "Tsk.tsk.tsk. Daan pa lagi ko, masuko g’yud si Jane nga gidaygan nako sa akong gugma," matud ni Loloy nga nagpanglingo-lingo. Nakatulog na lang si Loloy apan wala siya’y text nga nadawat gikan ni Jane.

Pagbangon ni Loloy nianang pagkabuntag, una niya nga gitan-aw ang iyang selpon. Naghinam-hinam siya nga duna nay reply gikan ni Jane, apan nabawo si Loloy kay wala siya’y nakita nga text message.

Luya nga gipindot-pindot ni Loloy ang keypad sa iyang selpon ug nag-send siya’g mga pulong kang Jane. “Sori Jane. Gitug-anan lang tika sa akong pagbati. Gikan karon, dili na ko magpakita pa nimo kay nauwaw ko.”

Mi-report si Loloy sa iyang trabaho bisan og wala siya sa maayong pamati. Nakahukom si Loloy nga mobisita sa higala niya nga si Sr. Supt. Juan dela Cruz nga maoy direktor sa kapolisan dinhi sa dakbayan.

Managhigala sila si dela Cruz dihang ang opisyal didto pa madistino sa Regional Intelligence Division. Giparking ni Loloy ang iyang kotse sulod sa kampo ug naglakaw siya paingon sa opisina sa opisyal.

Kabalikon si Loloy kay nakita niya nga dunay grupo sa mga media nga diha sa agianan paingon sa opisina sa opisyal. Nakahinumdom siya nga sa polis diay madistino si Jane isip intern sa estasyon sa radyo.

“Loy, dia ka lagi?” nakita ni Loloy si Jane nga nagngisi nga mitimbaya kaniya. Daw hilaw ang panagway ni Loloy apan naglibog siya kay mora’g wala man masuko kaniya si Jane. “Sori ha, wala g’yud ko’y load mao nga wala ko makatubag nimo,” pasabut ni Jane.

Karon nasabtan na ni Loloy nga wala diay masuko kaniya si Jane. “Kaila diay mo Jane si Loloy?” gisukna si Jane sa laing reporter. Nakabantay si Loloy nga daw hait og tinutokan kaniya ang police reporter nga maoy giuban-ubanan ni Jane.

“Diha usa mo kay arion usa nako si Kernel dela Cruz ha?” nananghid si Loloy kang Jane ug sa ubang reporters. Nakabantay si Loloy nga tam-is og pahiyom kaniya si Jane. (Sumpayan)