No offense meant kang Charice Pempengco pero daghan ang gustong mahibaw kung unsay purpose niya sa iyang lain-laing hairdo sa programang "X-Factor." Gawas nga nagpausab sa color sa buhok, lisod sabton ang styles ini.
Mora man siya'g gikalingawan sa iyang hair stylist. Ingon sa uban, para ma-notice? Daghan sad ang nakamatikod nga pa-slang mo-English ang singer bisan medyo dili gyud siya matawag nga articulate. Well, iya pud tingali nang style pero ang nakaguol lang kay makahatag man sa impression nga nausab na siya sukad nisikat.
Dili makatulog kun maghayang
SUGILANON Ni Bartolome Man. Panilagao Lacaron, San Fernando, Cebu
Bisan giunsa na lang og tutakilid ni Goyong, ang iyang lawas aron siya makatulog apan naunsa ba hinuon nga nanuktugaok na lang ang manok sa ilang silingan, wa man gayod siya makatagpilaw?
“Unsa goy nahitabo kanimo Goyong nga kaadlawon na lang wa man gayod ikaw makatulog?’ ni Eser pa nga nakaalinggat diay sa iyang bana.
Dili man gud tuyoon, manumbay sa kaisipan ni Goyong ang nahitabo ni anhing kumpare niya Masyong, nga gumikan sa pagkaparot sa miaging piniliay nga milangsad og konsehal ning ilang lungsod sa San Rafael, giatake sa kasingkasing gumikan sa dili tiaw nga kaguol.
“Unsa man hitaboa Pre Goyong, nga wa man gayoy prisinto nga bisan usa na lang ang akong nadag-an?” mausisahon nga nagpakisayod kaniya ang naanhing niyang Kumpare.
“Gi-loan gud nako ang akong yuta nga gitarokan sa akong balay lakip na ang akong toreyo nga kabaw ug ang akong anay nga umaanak aron imong i-apud-apod og hatag sa mga lunod patay nga lumalaban kanako sa bukiran sa Kampawog?”
Sa sinugdan, naamang si Goyong niadtong pangutana kaniya ni anhing kumpare niya Masyong. Unsaon, iya man kining gibulsa aron kuprason ang salapi nga gihatag kaniya, isip lider.
Nagtukod og nindot kaayo nga balay si Goyong gikan sa salapi nga gihatag kaniya ni anhing kumpare Masyong nga miresulta nga way bisan usa na lang nga mibotar kang anhing Kumpare niya Masyong.
“Kun wa pa lang ikaw magpadala sa tama ni Kumpare nato Goyong dili unta kitang magtiayon maingon niini ang atong kahimtang nga adlaw-adlaw na lang magtughong og bahaw nga binlod!” ni Noring pa nga hapit di na gani makapanapo.
“Tan-awa unsay nahitabo kanimo Masyong, manglusot na lang gani ang duha nimo ka itlog sa kagision na sa imong purol!”
Duha ka semana human sa piniliay giatake sa kasingkasing si Masyong gumikan sa kaguol ilabi na ang yuta nga gitarokan sa ilang balay imbargohunon na sa banko.
Nabaniog kining tanan nga nahitabo ning ilang dapit sa balangay sa Kampawog, lakip na si kumpare niya Goyong.
Sukad nalubong si anhing kumpare niya Masyong, kanunay nang mag-alindasay si Goyong sa gihigdaan niyang kutson nga iyang napalit gikan sa salapi ni anhing kumpare niya Masyong ug dili na siya makatulog kun maghayang.
Resulta na kini sa pagtunto og unay sa naanhing niyang kumpare. (Kataposan)