Tungod sa Uwan

Gula 2

Wala mobalibad apan wala usab motangdo ang maanyag nga tinun-an kun dawaton ba niya ang tanyag ni Loloy nga pahuwamon ra siya’g jacket aron ikasalimbong sa hugaw sa lapok nga nagbilin og lama sa iyang uniporme dapit sa buko-buko.

Mitutok kang Loloy ang babaye. “Pahuwamon ko nimo’g jacket? Unya unsaon nako pag-uli nimo nga dili man ta kaila?” matud sa babaye ngadto kang Loloy. Wala motubag si Loloy apan gikuha niya ang jacket ug mihapit siya’g punit og calling card gikan sa iyang cigaret box sa kotse.

“Isul-ob ni, KBP jacket ni,” matud ni Loloy. Daw nakurat ang babaye pagkakita sa logo sa KBP. “Radio announcer ka diay kay duna ka man niining maong T-shirt? Gusto ra ba ko nga mag-announcer mao nga mikuha ko sa kurso nga mass communications,” matud sa babaye nga mihinay pagsul-ob sa jacket.

“Haum kaayo nimo ang jacket miss. Dia ra ang akong calling card kun iuli na nimo ang jacket. Unya pa man sa first Sunday sa Septiyember nako na gamiton atol sa opening parade sa Cebu Broadcasters Month,” giingnan ni Loloy ang babaye.

Nagbilin og tam-is kaayo nga pahiyom kang Loloy ang maanyag nga babaye sa wala pa kini molakaw, apan wala kini motug-an sa iyang ngalan. Nabalaka si Loloy kay basin og dili iuli kaniya ang iyang jacket sa maong babaye gamiton ra ba niya kini sa mga activities sa Broadcasters Month.

Apan wala pa gani moabot si Loloy sa radio station nga iyang gitrabahoan, dunay mi-text kaniya. “Salamat kaayo Loy ha? Kun wa pa ko pahuwama nimo’g jacket maka-absent g’yud ko. Bilib akong mga classmate nga nagsul-ob ko’g KBP jacket. I’m Jane.”

Abtik kaayo nga gi-save ni Loloy ang contact numbers ni Jane. “Take care of your studies Jane,” matud ni Loloy. Paglabay sa pipila ka adlaw, naatol nga dunay meeting ang kadagkoan sa City Hall ngadto sa mga beneficiaries sa city scholarship program sa unibersidad nila ni Jane.

Gidala si Loloy sa kadagkoan sa City Hall ngadto sa unibersidad. Samtang nag-take note siya sa mga activities nga iyang gitambongan, nakurat si Loloy kay dunay mikuhit kaniya sa iyang luyo. “Sir, sori ha, wa pa nako ikauli nimo ang jacket, giganahan ko nga magsige’g sul-ob,” matud ni Jane nga nagsul-ob sa jacket ni Loloy.

Diha pa gayud masuta ni Loloy nga maanyag gayud diay kaayo si Jane. “Sige lang, nalipay ko nga imo diay’ng gisigihan og gamit Jane ang akong jacket,” ni Loloy pa. (Sumpayan)