Gula 6
Gidapit ni Cesar si Camel nga moapas kaniya sa Manila. Apan ang tinuod, komedya ra kadto niya kang Camel.
Apan napasubo si Cesar kay mi-reply si Camel kaniya. "Sige Sir maayo kay human na ang among exam! Oki ra ko apas nimo diha kay aron 'sab makaanha ko'g Manila. When ko padad-an nimo'g pamasahe?" matud sa batan-ong masahesta.
Wala gayud magdahum si Cesar nga mokubit si Camel sa iyang komedya ra gayud unta. "Tawgn nako ang ofc ugma sa bntag, pag cash advnce og P4T," giteksan ni Cesar si Camel.
Tuod, nakaabot ra gayud si Camel sa Manila pagkahapon. Gihatagan niya'g instruction nga gikan sa airport, mosakay siya'g taksi ug magpahatud lang sa Intercontinental Hotel. Wala na mokuha og laing kwarto si Cesar.
"Aw anhi ra ko nimo pahigdaon sa imong room Sir?" matud ni Camel nga may dala nga pahiyom ang panagway. "Usa na lang gud ta ka kwarto kay matud pa nimo kun magkita ta, manguyab na ko nimo," matud ni Cesar.
Gikusnit ni Camel ang kilid ni Cesar. "Ayaw na ko'g tawga og Sir, tawga lang ko sa akong ngalan," matud ni Cesar.
"Tana, mangaon na ta. Maayo kay daghang mga kauban namo nga taga Manila nga dili na mag-dinner sa hotel aron dili na ta makagasto pa," matud ni Cesar. "Maligo usa ko uy kay alimuot kaayo gikan sa biyahe," ni Camel pa.
Samtang nagpaabot nga mahuman og kaligo si Camel, naghigda-higda si Cesar sa kama. Nagbutok-butok na pagsugod ang iyang dughan. Walay dapit nga makasalimbong ni Camel kun mag-ilis na siya sa iyang sapot human kini maka-kaligo.
Wala danti og dugay, migawas si Camel sa banyo. Nagtapis kini og tualya. "Hala, unya mag-ilis man ko Sir, talikod lang ka," matud sa dalaga. Wala motubag si Cesar ug nagsige kini'g tutok kang Camel nga nagtapis sa tualya.
Hinay'ng mitindog si Cesar ug giduol ang dalaga. "Camel, nasayud ka na g'yud nga may pagbati ko nimo. Kita ra ang ania karon sa kwarto," giingnan ni Cesar ang batan-ong masahestasamtang mainampingon niya kini nga giagbayan.
Wala paabuta ni Cesar nga migakus kaniya si Camel. Nagdikit ang duha nila ka lawas. Gipatikan og kiss ni Cesar ang lamurok nga aping ug dayon sa lips ang dalaga. Wala tuyoa nga hinay-hinay'ng nahulog ang gitapis nga tualya ni Camel.
"Unang higayon nga misalig ko og lalaki Sar," matud ni Camel. "Salamat Mel. Ayaw kabalaka kay ulitawo ko Mel. Paundangon na tika sa imong trabaho kay pakaslan tika," ni Cesar pa. Nagparayganay dayon silang duha. (Kataposan)