Masahesta

Gula 6

Gi-replayan ni Cesar ang text message gikan ni Camel. Gisukna niya kun pila ang gikinahanglan niini nga kuwarta nga kuwang sa pangbayad sa matrikula sa tunghaan.

“P2T kapin Sir kay dia na may imong gihatag nako,” matud ni Camel, ang masahesta nga nagdala sa angga nga Nelly. Gipasaligan ni Cesar ang guwapa nga masahesta nga sulbad na ang iyang problema. “Ugma hatagan tika sa kuwarta sa dili pa ko molarga sa Manila,” matud ni Cesar. Sa kalipay, mitawag gyud si Camel kang Cesar. “Salamat kaayo Sir ha? Wala g’yud ko’y ikabawos sa imong kaayo nako.”

Sa wala pa molarga si Cesar paingon sa Manila, nagbilin siya’g P3,000 sa cashier sa ilang opisina. Giteksan niya si Camel ug giawhag nga adtoon sa ilang opisina aron kuhaon ang kuwarta. Usa ka semana nga moestar si Cesar didto sa Manila.

Hapit na moudtong tutok, nakadawat si Cesar og text message gikan ni Camel. Nagpasalamat kini kay nakuha na niya ang kuwarta. Nagpahibalo kini kaniya nga ibayad dayon niya sa eskwelahan ang kuwarta.

Bisi kaayo si Cesar sa gitambongan niya nga seminar sa Manila. Wala na siya maka-text kang Camel sulod sa pipila ka adlaw. Matulog na unta si Cesar sa iyang kuwarto sa hotel dihang mitingog ang iyang message alert sa selpon.

“Muzta Sir, miss u na baya.” Gikan diay ni Camel ang text. Nakapahiyom si Cesar. Gireplayan niya si Camel. Nakahuna-huna siya nga iyang komedyahan ang dalaga. “Kun naa ko diha wa man sa’y kapuslanan kay dili ka magpahikap.”

Wala madugay nakadawat si Cesar og reply. “Sori adto Sir ha, wa gyud ko maanad nga magpahikap-hikap sa akong mga customers nga magpamasahe nako. Oki ra kun uyab ang mohikap,” pasabot ni Camel. Nasabtan ni Cesar nga buotan gayud diay si Camel. “Kaswerte sa makauyab nimo no?” matud ni Cesar sa iyang reply. “Mao gyud,” mubo nga tubag ni Camel.

“Kun manguyab ko nimo Camel, pwede ba?” Daw naghinamhinam si Cesar kun unsay itubag kaniya sa dalaga. Wala dayon siya makadawat og reply. Apan taud-taud, nadawat niya ang reply ni Camel.

“Uli na diri sa Cebu para makapanguyab ka nako. Karon na miss baya tika Sir tungod sa imong kabuotan,” ni Camel pa. Nasabtan ni Cesar nga daku siya’g tsansa nga sugton ni Camel. Tulo ka adlaw pa usa mahuman ang gitambongan niya nga seminar.

Apan adunay nahuna-hunaan nga paagi si Cesar. Giteksan niya si Camel. “Apasa ko diri sa Manila, padad-an tika’g kuwarta para plete sa plane.”—Sumpayan