Gibinuangan lang

Have a wonderful day. Just call me B.A, usa ka dalaga ang akong problema mahitungod kini sa akong lovelife.

Nakauyab ko sa una, Tita, apan wala kaayo magdugay ang among relasyon tungod kay nasakpan man nako siya nga dili seryoso sa among relasyon. Iya lang diay ko nga gibinuangan. Gisakitan gyod ko sa iyang gibuhat ug mora ko og nitagam ug nisaad sa akong kaugalingon nga dili nako manguyab ug dili nako mahigugma tungod kay mahadlok nako nga binuangan pag-usab.

Apan duna koy bag-ong nakaila sa cellfon, wala pa gyod mi magkita sa personal. Apan kining akong textmate interesado kaayo nga makigkita nako. Matud niya nga na-inlove na siya nako bisan kun sa fon lang kami nagkaestorya. Matud pa niya nga manguyab kuno dayon siya nako kun magkita na mi.

Ang iya ra bang mga ig-agaw nagtuo na nga uyab na mi bisan dili pa. Sa pagkakaron nagduhaduha man ko nga mobalik pagsulod niining gugma, Tita. Anaa gyod sa akong hunahuna nga mahadlok ko nga masakitan pag-usab. Unsa kahay akong buhaton? Palihog pasabta ko. Daghang salamat sa imong pagtagad. -- Ms. B.A.

* * *

Dear Ms. B.A.,

 Sa dili ka pa mosulod niining gugma andama kanunay ang imong kaugalingon. Dapat kun ma-inlove ka andam ka kanunay nga masakitan kay ang gugma puno kini sa mga surprises. Panagsa ra ang gugma nga walay kasakit. Pero tungod sa imong kasakit makaingon ka nga in love gyod ka kay dili ka maapektohan o masakitan sa tawo nga wala nimo higugmaa, “love is the root of all passion,” Gisakitan ka tungod kay love nimo siya.

Busa, sa dili ka pa mobalik pagsulod nianang gugma i-condition una ang imong kaugalingon. Andama una ang imong kasingkasing nga modawat sa tanan nga mahitabo kalipay man o kasakit, samtang ikaw nahigugma kay kun aware kanang daan sa mga posibleng mahitabo dili ka na mahadlok nga masakitan.

Maoy hunahunaa nga sa gugma dili kanunay nga malipayon ka kay matud nila nga ang kinabuhi mora og ligid usahay mailawom ug usahay maibabaw ka. Natural lang nga masakitan ka, ang importante nga gihatagan ka og kahigayonan nga mahigugma. Ang lisod lang kay dili nato kontrolado ang dapat. Dunay mga panghitabo nga pilit natong dawaton kay maoy gimbut-an sa kahigayonan. -- Tita Salie