Pagbugtaw sa Damgo

Gula 6

Nasina siya sa ubang mga magdadagang. Kanunay nagbansiwag ang ilang mga ngalan sa Bantayog nga gidumala ni Edito Perfecto. Apan siya, ang kabalaw maoy kanunay mohimamat matag suhid niya sa mga panid sa maong mantalaan kay wala mapatik ang iyang hinagoan.

Nakaingon siya sa iyang kaugalingon nga suwerte gayod kaayo ang tawo nga duol sa kusinero. Sama sa uban nga kaniadto sama lang usab kaniya nga usa ka magsusulay apan karon nahimo nang hingpit nga magdadagang. Naikag siya sa ilang kapalaran. Naibog siya sa ilang kasuod ngadto ni Edito Perfecto. Kun suod pa lang usab niya si Edito Perfecto, hayan nakalusot na usab ang mga abot sa iyang dagang sa higpit niining barahan.

Apan dihay suwab sa kahiamgo nga nakaputol sa sungay sa mao niyang daotang pagtuo. Nahinumdom siya sa iyang uyoan nga usa ka ulitawong guwang. Oo, si Tiyo Tibur niya. Hilomon nga pagkatawo ang iyang uyoan. Dili daghan og higala si Tiyo Tibur niya, dili tungod sa pagkaburukinto kun dili tungod sa katahaan niini nga pagkahilomon. Apan kanunay nagbansiwag ang ngalan ni tiyo Tibur niya sa Bantayog. Usa na ka malamposon nga magdadagang ang iyang uyoan. Nakahimo na kini’g ngalan sa natad sa katitikan bisan dili suod niini si Edito Perfecto. -- Sumpayan pa