Mga tinun-an gilambigit sa paghipos sa basura

CEBU, Philippines - Giisip nga malampuson ang mga magtutudlo sa mga publikong tulonghaan sa dakbayan sa Mandaue sa gipasiugdahang garbage segregation o pagbahig sa madunot ug dili madunot nga mga basura sa ilang mga tulonghaan nunot usab sa paglambigit sa mga tinun-an sa kampanya sa kagamhanan.

Nunot sa mao nilang kalampusan ang mga girls scout ug mga boy scouts sa Mandaue City Science High School mihimo na usab karon sa pagpanggawas sa kadalanan sa pagdakop niadtong mga tawo nga   magpataka lang og labay sa ilang mga basura.

Ang mao nilang pagbantay sa dalan niadtong miaging adlaw miresulta usab sa pagkasikop sa 150 ka mga tawo nga ilang naaktohan nga naghimo niini.

Sa nasayran sa Banat News nga ang 24 ka mga scouts gikan sa maong tulonghaan maoy nagsilbi karon nga kaabag sa mga eco-warden gikan sa barangay Ibabao-Estancia sa maong dakbayan.

Dugang nga naghimo karon sa pagbantay sa kadalanan mao ang mga kawani gikan sa solid waste management program sa dakbayan ug kauban usab sa pipila ka mga sakop sa kapolisan. Naglakip sa ilang gibantayan mao ang tulo gayod ka mga lugar sa dakbayan nga namatikdan nga nagpataka lang sa pagpanglabay sa ilang mga basura ang mga molupyo mao ang dapit sa cockpit coliseum sa Ibabao, ubos nga bahin sa Maguikay flyover ug Pacific Mall.

Si Ibabao Estancia Barangay Kapitan Carmelino del Mar Jr., maoy nangulo sa maong kalihokan ug ubos usab sa koordinasyon ni solid waste management program coordinator nga si Engr. Gaga Mendoza.

Si Mendoza nga nahinabi sa mga tigbalita miingon ang 150 nga ilang nadakpan atol sa mao nilang operasyon wala pa nila pabayara og multa gumikan kay unang higayon pa man sa ilang operasyon maoy hinungdan nga igo lamang nilang gipahimangnoan. (BANAT NEWS)