CEBU, Philippines - Duha ka iladong mga Sugbuanong singers mitambong gyod sa ilang gitawag nga once in a life time class reunion sa Batch 74 sa Bulacao Community School sa Bulacao, dakbayan sa Sugbo.Nahitabo kini niadtong miaging Domingo, Hulyo 29, sa dakong wanang sa gym sa naasoy nga tunghaan.
Ang duha ka iladong singer mao sila si Dulce ug Bobstel Bacalso nga gawas nga pulos taga Bulacao, manag-agaw usab nga pulos mga maayong moawit.
Apan hinoon, si Dulce maoy mas ilado nilang duha sa tibook nasud. Si Bobstel gipadala sa Manila alang sa usa ka bangga. Apan bisa’g dili siya ang napiling national champion, matud pa sa mga taga Bulacao, dako lang gihapon nilang dungog nga duna sila’y duha ka mga singers nga dili malalis, pulos mga maayo gyod.
Sa pagka karon, si Bobstel, gawas nga adunay banda ug kanunay’ng may mga singing engagement usab, siya usab ang nag-manage sa Wilkris Appliances nga kasamtangan anaa sa eskina sa Sanciangco ug Borromeo human masunog ang ilang tindahan diha sa may Gaisano-South.
Si Dulce nga nailang Asia’s Diva, gikan pa sa iyang guesting sa anibersaryo sa TV Patrol. Misalikyat usab siya’g tambong ug miawit sa lubong sa inahan sa usa usab niya ka kauban sa klase sa high school sa Pardo Gullas High School diin diha usab magtungha si Bobstel Bacalso.
Hinoon, ang dako’g pahat sa gasto sa ilang reunion mao sila si Sonny Bacalso nga taga Alabama, USA ug Liza Abendan nga gikan sa Colorado. Nagpa-raffle hinoon si Dulce sa iyang mga bag-ong CD. (BANAT NEWS)