Gimingaw

Dear Tita Salie,

A blessed day to you, Tita. Just call me Angel, usa ka minyo ug dunay 3 ka buok mga anak. Nagbulag mi sa akong bana ug tua kaniya ang tanan nakong mga anak.

Naminyo na ang akong bana ngadto sa laing babaye, Tita ug ako usab nagminyo na lang pud og lain apan subo kaayong hunahunaon nga kutob ra gyod kami sa puyopuyo kay dili na man puyde makasal.

Ania ko karon sa Cebu tungod kay dinhi man ko nagtrabaho. Ug ania usab sa Cebu ang akong live-in partner. Pero sa tinuod lang, Tita, mas love gyod nako ang akong unang bana. Siguro panakip butas lang nako kining akong live-in partner karon. Grabe na kaayo ang gibati kong kamingaw sa akong mga anak ug ingon man sa akong unang bana.

Matud pa sa akong mga amiga nga ang mga bata mangita gyud kini sa ilang inahan o amahan. Tinuod ba kini, Tita, nga mangita kanako ang akong mga anak? Naguol gyud ko nga naghunahuna niini misamot ang kamingaw nga akong gibati ngadto kanilang tanan.

Unsa may akong buhaton, Tita? Palihog pasabta ko ug tabangi ko nga masulbad ang akong problema. Daghang salamat ug God bless.

-- Angel

* * *

Dear Angel,

Mas maayo gyud unta nga sa dihang wala pa kamo magbulag sa imong bana, dihang nag-away-away pa lang mo nangita ka na unta og tawo nga makatabang aron maluwas ang inyong kaminyoon. Siguro dili unta moabot sa punto nga ingon niini. Kay ang away sa mga magtiayon mora kini og sakit nga hinayhinay mopatay sa tawo kun imong pasagdan ang gamay’ng sakit nga gibati sa lawas.

Ang simple nga lalis o away-away sa panimalay kun imong pasagdan o dili atimanon hinayhinay nga mopatay sa maong relasyon. Busa kun magsugod na gani og kabugnaw ang inyong relasyon, dapat ang bana ug asawa mangita gyud og paagi nga ma-resolve ang isyu. Aron ma-resolve ang isyu kinahanglan gyud nga magtambayayong ang duha, mohatag gyod sila og panahon aron sila magkaestorya. Ilang estoryahan ang ilang problema. Ug aron dunay estoryahanay nga mahitabo dapat usa kanila nga kamao mopaubos aron paminawon ang nag-estorya.

Apan dili pa ulahi ang tanan, Angel, ayaw kalimti nga ikaw ang asawa. Busa mas may katungod ka sa imong bana ug mas may katungod ang imong bana kanimo kay kamong duha ang kasado. And yes, tinuod gyod nga mangita ang mga bata sa ilang amahan ug inahan. Busa kun gimingaw ka nila, pangita og paagi nga makita nimo sila og magakos apil ang imong bana. Sultihi sa tinuod nimong gibati. Ug ipasabot sa inyong mga anak ang tinuoray nga nahitabo sa inyong relasyon.

-- Tita Salie