Gula 1
Nagdamgo siya. Oo, nagdamgo siya. Makadaghan na siya nagdamgo. Kanunay siyang nagdamgo. Adlaw ug gabii siyang nagdamgo. Nagdamgo siya sa panahon nga siya natulog. Apan ang iyang damgo dili bunga sa katulogon. Ang iyang damgo usa ka bunga sa mapangindahayong pagbati; usa ka pangandoy sa kalag.
Nagdamgo siya nga maghimo og ngalan sa iyang kaugalingon. Nagdamgo siya niini dili tungod kay wala siya’y ngalan nga binunyagan. May ngalan na siya nga gihatag sa iyang mga ginikanan sa iyang pagkahimugso niining kalibotan. Siya si Melchor Bantogan sa pag-ila sa katilingban. Apan alang kaniya, wala’y kabug-aton ug wala’y bili ang maong ngalan kun dili makabaton og katumanan ang iyang pangandoy.
Oo, nagdamgo siya nga himuong reyalidad ang iyang ngalan. Gusto niyang himuong bantayog ang iyang kaugalingon. Buot niyang hatagan og kahulogan ang iyang ngalan aron ikapamatuod sa tibuok kalibutan nga wala masayop ang iyang mga ginikanan sa pagpili sa maong ngalan alang kaniya. Gusto niyang mahimong tipik sa kasaysayan ang iyang ngalan.
Mao kini ang damgo nga kanunay nagmulto sa iyang kaugalingon. Adlaw ug gabii siyang gihasol sa maong damgo. Nakapasalimuang sa iyang galamhan ang iyang damgo. Nakapaalindasay kini sa iyang kaisipan ug nakasamok sa iyang hunahuna. Nagpaninggit kini og katumanan. -- Sumpayan pa