Wala na magpakabana

Dear Tita Salie,

Good day, tagoa lang ko sa pangalan nga Vicky, dili pa minyo apan dunay anak. Wala na mi magtipon pagpuyo sa amahan sa akong anak tungod kay wala na mi magkasinabot. Ug dili man usab kami kasal so, walay problema.

Upat na ka bulan ang among anak. Sa dihang nagbuntis pa ko sa among anak, Tita, anaa gyud ang tanang suporta nga akong gipangita wala gyud ko magproblema. Ug misaad pa siya nga iyang tabangan ang akong igsuon ug ang akong inahan.

Apan karon nga mipauli na siya sa ilaha, panagsa na lang siya mohatag og suporta sa among anak. Labina karon nga nagsige og kasakit ang among anak mora og wala na siya magpakabana. Kinahanglan pa nako siyang adtoon aron sultian kun na unsa ang bata. Kinahanglan pa adtoon nako siya sa ilaha aron makuha ang iyang suporta sa among anak.

Dili gyud siya magpakabana bisan lamang sa pagduaw sa among anak. Nausab na gyod siya karon, Tita Salie. Gusto unta nako nga mobalik ang iyang kadasig sa pagtabang sa among anak aron usab dili ko maglisod sa pagpadako niini, bisan pa man kun dili mi tipon sa pagpuyo.

Unsa may akong buhaton, Tita Salie? Palihog Pasabta ko. Thank you very much and may God guide you always.

-- Vicky

* * *

Dear Vicky,

Siyempre na man ug natural lang nga duna gyoy kausaban sa iyang pagpakabana kaninyo ug sa imong anak tungod kay lahi na man ang sitwasyon. Dili na man sama kaniadto nga anaa lang siya uban kaninyo, so, wala siya’y choice kun dili atimanon gyud kamo. Anaa gyud siya kun magkinahanglan ang inyong anak tungod kay iyang makita kanunay ang sitwasyon sa bata.

Lahi na karon tungod kay layo namo. Ug nagkalagyo mo tungod kay dunay something nga wala mo magkasinabot. Busa duna nay gap between ninyong duha. Mas misamot pa gyud ang gap ninyo tungod kay inyong gibutangan og pride, parehas mong duha, so, dili na gyud siya makadalidali nimo og pangumosta kun naunsa ang inyong anak, tungod sa inyong gap, tungod sa wall nga gitabangan ninyo pagpabarog aron maglisod namo pagduol sa usa’g-usa. Mao nga ang resulta anaa man kanimo ang bata ikaw gyod ang mapugos pagduol kaniya kay ikaw man ang nagkinahanglan alang sa inyong anak.

Ayaw pasagdi ang pride nga mokaon sa inyong maayo untang relasyon. Tingali kun dili pa ulahi ang tanan ug puyde pa ninyong balikon pagpabarog ang inyong nahugno nga pangandoy. Tangtanga ang garbo ninyo sa usa’g-usa ug pulihi kini sa inyong gugma aron magmalipayon pagbalik ang inyong pamilya. I am pretty sure bugnaw nga panghunahuna ug paraygon nga tingog ra gyod ang kulang ninyo.

-- Tita Salie