“Napakyas ang demolisyon, mayor. Gisuklan kami sa mga kabos nga lumolupyo sa Punta. Isog kaayo sila. Daghan sa akong mga sakop ang nasamdan.”
“Mga inutil mong dagko!” Mibuto siya sa kasuko. “Nganong wa man ninyo gamita ang inyong mga armas?”
“Daghan kaayo sila, mayor,” pasabot ni Max. “Pulos sila armado og pinuti, pana, bangkaw ug sapang. Mahimong makapatay kami’g pipila kanila kun gamiton namo ang among mga pusil apan maalaot gihapon kami tungod sa ilang kadaghan.”
“Buysit,” nagpaminti siya. “Nakakat-on na gayod pagsukol kanako ang mga way nahot!”
Wala’y tingog gikan sa pikas tumoy sa telepono.
“Lakaw ngari sa akong buhatan karon dayon, Hepe,” mando sa mayor. “Magsulti kita’g maayo mahitungod niining hitabo.”
“Matuman, Mayor,” ni Max.
Giabyan sa pangusmo ang pagbutang ni Mayor Antigua sa awditibo sa telepono. Wala siya’y kalainan sa usa ka leyon nga nasuko gumikan sa paglighot sa iyang tukbonon. -- Sumpayan pa