Ang bahandi ni Cleto Mangtas

Dugay nang naglaraw sila si Tomos ug ang iyang tulo ka mga barkada nga ilang sak-on ang karaang balay nga gipanag-iya sa tiguwang nga si Cleto. Kini si Cleto mao ang labing dato dinhi sa ilang dapit kay duna sila’y lima ka apartment didto sa siyudad ug lapad usab ang iyang kalubihan ug ingon man ang iyang uma nga gitamnan og mga lagutmon.

Duna siya’y ransohan nga tua mahimutang sa bukid diin ang nagbantay didto mao ang iyang mga saop ug mga pinili niyang mga ransero.

Hinuon, dili man dawo kini si Cleto kun duna gyu’y moanha sa iyang dako ug karaang balay nga naa magbuntaog sa bungtod nga nag-umbaw dinhi sa balangay sa Candulom. Apan ang uban nga nakasuheto kang Cleto na lang mosuway pagpanghuwam og kuwarta kaniya kay lagi gidungog man kini siya nga ungo.

Dunay nakakita nga nagtuwad kuno si Cleto sa may tulay paingon na sa ilang pinuy-anan. Si Cosme nga dugay nang nag-alagad kaniya isip hardinero mikulipas gyud nga dili ungo si Cleto apan si Matilde nga maoy labandira misugid nga iyang nakita sa duha niya ka mga mata nga si Cleto nagtuwad sa may tulay nga duol sa karaang akasya.

“Unsa man ready na mo?” ni Tomos pa ngadto sa iyang mga barkada. “Sak-on na nato ugma sa gabii si Cleto ug atong kuhaon ang iyang mga alahas ug labaw sa tanan ang iyang kuwarta nga nagtumpi-tumpi sa kadaghan...”

“Unya, kun mailhan ta, luoy kaayo ta. Tingkagol ta sa prisohan,” mora’g gibati’g kabalaka si Timoy, ang usa sa mga barkada ni Tomos.

“Sus, ka gago gyud nimo, uy, Timoy. Unsaon pagkaila sa tiguwang nato nga magmaskara man ta,” mikunot ang agtang ni Tomos. “Aw, kun mahimo, ato siyang gulgolon...”

Wala na maningog ang mga barkada ni Tomos, kay alang kanila mamahimo na unya silang dato sa higayon nga ilang matulis si Cleto. Tuod, nianang pagka-ugma sa gabii ila dayong gisaka ang karaang balay ni Cleto.

Mingaw ang sulod sa karaang balay ug dihay usa ka buok iring itom nga naglingkod sa may sopa. Giandam nila ni Tomos ang ilang armas aron kun magkina-unsa, ilang patyon si Cleto. Unya may miabli sa usa sa mga lawak sa karaang balay.

Nahalingi sila si Tomos ug maoy ilang nakita ang usa ka tiguwang tawo nga puti na kaayo ang buhok ug kalma kaayo kining miabiabi kanila. Mora sila’g giugbok nga mga kandila nga wala makalihok apan sa ilang mga kamot diha ang ilang mga armas nga pistola nga kalibre .38.

“Sayod kong dugay na mong nagtinguha nga sak-on ninyo kining akong karaang balay,” niini pa nga nagpahiyom. “Maayo... maayo kay nia na gyud mo...”

“Kining...kuan...nia mi, kay amo kang patyon,” ni Tomos pa nga namugnaw dihang gitutokan siya sa tiguwang. Unya milingi ang tiguwang habig sa tuo ug may gipangtawag. “Dali na mo, Matildi, Cosme, panggawas na mo dinha sa inyong mga kuwarto...”

Ug dinhay duha ka iring itom nga ilang nakita nga nanggawas sa usa ka kuwarto. Milanog ang katawa ni Cleto. Dugay.

“Cosme, Matilde, nia ang inyong silingan, he, he,” ni Cleto pa milingkod sa sopa tupad sa usa usab ka iring itom nga diha nang daan sa ilang pag-abot.

“Sila kana si Matilde ug Cosme, kanang duha ka iring?” mora’g gibati’g kahadlok si Tomos, apan mikalit siya pagmando sa iyang tulo ka mga barkada aron pusilon ang tiguwang apan igo lang kining mitukiki pagkatawa.

“Dili makabuto kanang inyong mga pistola, kay nia mo sa sulod sa akong karaang balay, he, he, he. Ug karong gabhiona, kay gusto man kaha mong mangadato, okey, ihatag ko kaninyo ang akong mga alahas ug kuwarta. Apan sa usa ka kondisyon, nga karong gabhiona himuon ko kamong mga iring nga itom sama nila ni Matilde ug Cosme ug ingon man niining akong tigluto dinhi nga si Tasya, aron daghan na ta inig ka Biyernes sa gabii, magdungan ta’g pangabat ug adto ta mamalbal sa pikas lungsod, he, he, he, he...” Ug may gikuha si Cleto nga mora’g usa ka garapon diha sa ibabaw sa usa ka pasistor ug ilang nakita ni Tomos nga may sulod kining mora’g likido nga bulok pula. Ug gipainom niya sila si Tomos nga wala na motutol kay mora’g gihipnotismo sa tiguwang.

Taudtaod, mao nay mabati sa sulod sa karaang balay ang mga tingog sa pito ka buok iring nga nagngiyaw nga sibaw kaayo ug langgis kaayong paminawon. Dinhi mikatawa si Cleto.

“He, he, he, he, karon, daghan na ko’g mga sakop! Ug duna pa unya koy himuong mga iring nga itom kutob sa moanhi dinhi sa karaang balay nga akong pinuy-anannnn...wakkk..wakkkk.” Ug mihinay paglakaw si Cleto ug mihinay usab pagsunod ang pito ka buok iring itom, ug didto sila mopaingon sa tulay duol sa karaang akasya. (Kataposan)