Walog sa mga Luha

Gula 7

Nagpasalamat si Vivian kang Atty. Razon sa paghatag kaniya og maanindot kaayo nga selpon.

“Mailisan na g’yud tawon ang karaan nako nga selpon atorni, salamat kayo ha?” matud ni Vivian kang kansang panagway puno sa pahiyom. 

“Pwede ba dapiton tika unya og panihapon inig-off nimo sa trabaho?” matud sa hamtung nga abogado. Nagduha-duha sa pagtangdo si Vivian kay maikog siya sanglit stay-in man siya sa balay sa tag-iya sa gitrabahoan niya nga bazaar.

Apan dali ra nga nakasabot kaniya ang abogado. “Ako’y mananghid sa tag-iya sa tindahan nga imong gitrabahoan Vian, suod kaayo nako nga amigo si Mr. Cheng. Kuhaon tika unyang alas siete sa gabii. Okay?”

Walay nahimo si Vivian gawas sa pagtangdo. Tuod, alas singko pa sa hapon diha na si Atty. Razon. Diritso kini nga misulod sa opisina ni Mr. Cheng. Giduol si Vivian sa kauban niya nga tindera. “Vian, pasudlon ka sa opisina ni Mr. Cheng, may tuyo siya nimo.”

“Vian, gipananghid tika ni Mr. Cheng nga iuban tika sa birthday sa akong anak ug nga dili ka na lang mohuwat pa sa pagpanira sa tindahan,” matud ni Atty. Razon. “Sige Vivian, ubani si Atty. Razon, makasalig ka niya kay suod ko siya nga higala,” dason ni Mr. Cheng.

Sulod sa sakyanan sa abogado, wala makapugong si Vivian sa pagpangutana. “Nganong sa tanang tindera ni Mr. Cheng, ako ra may imong giimbitar atorni?” Wala dayon motubag si Atty. Razon. Pagkataud-taud. “Dili na ko magdugay-dugay pa Vian, byudo na ko kapin sa duha na ka tuig. Pagkakita nako nimo, nabanhaw ang akong pagbati. Maayo unta og dili ko nimo pakyason.”

Gipasabot si Vivian sa abogado nga minyo na pulos ang iyang mga anak apan nanginahanglan gihapon siya og makauban sa kinabuhi.

Wala ika-uwaw ni Vivian pagsugilon ngadto sa abogado ang mapait niya nga kasugiran sa gugma. Apan wala kini igsapayan sa abogado. “Ipahikay dayon nako ang atong kasal Vian kun mosugot ka nako.”

Sa hilom nagpasalamat si Vivian sa kahitas-an nga sa paghubas sa luha sa iyang mga mata, may masanag pa diay nga ugma sa iyang kinabuhi. Gihunong ni Atty. Razon ang sakyanan daplin sa karsada, ug nagparayganay silang duha. (Kataposan)