Walog sa mga Luha

Gula 6

Gawas sa buwak nga gipadala ni Atty. Razon kang Vivian, duna pay gipataban nga maanindot kaayo nga card.

Gisungog pag-ayo si Vivian sa iyang mga kaubang tindera. "Maminyo na g'yud si Vivian ani og abogado, ayaw'g dugay-dugaya day," matud ni Cleofe nga maoy usa sa mga suod kaayo ni Vivian.

Pagka-ugma, wala damha ni Vivian nga mobalik si Atty. Razon sa tindahan ug may dala nga plastic bag. "Duna ko'y gift para nimo Vian, unya na lang kana ablihi kun break na nimo sa trabaho," matud sa abogado.

Dili masukod ang kalipay ni Vivian nga gihatagan siya og gift sa abogado nga iyang customer. Naghinam-hinam siya kun unsa kaha ang gift kaniya ni Atty. Razon.

Nianang pagka udto na, human og kaon ni Vivian. "Sigi na day buksi na ang gift nga gihatag ni Atty. Razon para makakita mi'g unsa na," ni Cleofe pa. Gibuksan tuod ni Vivian ang gift.

"Hala mora man kini og selpon! Hala selpon g'yud diay! Mahalong selpon!" nakasinggit si Vivian sa kalipay samtang klaro kaayo nga naibog ang iyang mga kauban sa trabaho.

"Dugay na man ko dinhi nga nagtrabaho apan wala gayud mi makasuway nga dunay customers nga manghatag og selpon. Naibog gayud nimo ang abogado day Vian," matud ni Rose.

Gawas sa selpon nga touch screen, duna pay giandam na nga Sim Pack. Gitabangan si Vivian nila ni Rose ug Cleofe sa pagtaud sa selpon. Pagkahuman, ilang gitan-aw ang phone book.

Nakit-an nila ni Vivian nga duna nay usa ka ngalan nga gi-encode sa phone book. Nasabtan nila nga iya kini sa abogado kay una may ngalan nga Atty. Raz.

Giteksan nila ang maong numero. Wala madugay, mitingog ang call alert. "Hello, si Vivian kini? Unya nalipay ka ba sa imong gift nako?" pangutana ni Atty. Razon sa dalaga. (Sumpayan)