Gula 5
Dinhi mihagtos na gayod ang pailob ni Mayor Antigua. Dihay liso nga miturok sa iyang hunahuna. Nangudlot ang daotang laraw sa iyang kaisipan. Wala’y arang kun gamiton niya ang iyang gahom kay siya ang hawod sa lungsod. Dili siya gustong maulawan kang Kee Lai Tong. Nakapasalig na siya sa langyaw nga siya nay bahala sa pagpasabot sa mga kabos nga lumolupyo sa Punta.
“Kamo lang,” naglukim og pasidaan ang mga pulong ni Mayor Antigua. Ug mibahad siya. “Dili kamo mahigawad kun maoy inyong gusto ang paugat.”
“Wa mi mahadlok, Mayor,” sa katawhan pa nga daw mihagit na hinuon kaniya paggamit sa iyang gahom. “Andam kaming magpakamatay aron pagpanalipod sa among katungod.”
Sa kaisipan ni Mayor Antigua dihay bagang kakugnan nga giduslitan sa kabos nga mga lumolupyo sa Punta. Mipasunding ang lilas sa usa ka dakong sunog nga miulbo sa iyang handurawan.
Nagpadala si Mayor Antigua og duha ka buldoser ngadto sa Punta. Gipakuyogan niya kini sa mga polis nga gipangulohan sa iyang hepe nga si Max. -- Sumpayan pa