Tabog sa Putyokan - Gula 3

Labaw pang dili mosugot kaming mga magyuyuta nga tukoran og pabrika kining among dapit,” misagbat si Sidro nga maoy pangulo sa pundok sa mag-uuma. “Wala na unya kami panginabuhian ug kapuy-an kay sakmiton man sa langyaw ang yuta nga maoy among gisaligan sa panginabuhi ug gitarokan sa among mga pinuy-anan.”

“Dili man kamo alkanse niana,” mipasabot ang mayor. “Bayran kamo sa langyaw sa parsela sa inyong yuta nga mahilakip sa dakong luna nga gikinahanglan alang sa pagtukod og pabrika.”

“Basta dili mi mosugot,” pintok ug undan ang mga pulong ni Sidro. “Dili namo ibaligya ang among mga yuta tungod kay kabilin kini namo sa among mga ginikanan.”

“Nakasabot ako sa inyong gibati karon,” ni Mayor Antigua pa nga bisan mibati na og kapikal naningkamot sa pagpugong sa nagpanglugnot niyang kasuko. “Apan ingon gayod niana ang mahitabo kun mangita kita’g kauswagan. Kinahanglan nga aduna’y isakripisyo. Mao na kini ang gipangayo sa panahon kanato karon. Kinahanglang isakripisyo ninyo ang yuta nga bililhon kaayo alang kaninyo. Dili man usab kamo mahigawad kay kabulahanan man ang tugbang sa maong sakripisyo.” -- Sumpayan pa