Walog sa mga Luha

Alang kang Vivian, daw nahugno kaniya ang tibuok kalibutan dihang gibiyaan siya ni Roger nga nahimo niyang boyfriend sulod sa tulo ka tuig.

Nagtoo na gayud si Vivian nga si Roger na ang lalaki nga modala kaniya sa simbahan aron adto bugkuson ang tagsa-tagsa nila ka pagbati nianang gitawag og kaminyoon.

Halos giitos ni Vivian sa pagpatulo ang iyang luha sa paghinilak dihang giteksan siya ni Roger nga dili na lang pagpaabut kaniya human kini mipauli sa ilang dapit sa Mindanao.

Gitugyan na gani ni Vivian kang Roger ang tibuok niyang lawas. Dili kay makausa lang kun dili sa makadaghan gayud nga higayon nga giangkon ni Roger ang iyang pagka babaye.

Didto si Vivian sa dapit nga sagad sila magkita si Roger. Usa ka punoan sa dakung mangga nga nahimutang unahan sa ilang balay maoy dapit nga sagad silang duha magkita.

Duna kini lantay nga lingkoranan nga gihimo sa Tatay ni Vivian sa wala pa kini mamatay. Wala pa makalimot si Vivian nga misaad gani si Roger kang Tatay niya Inting sa buhi pa kini nga dili gayud siya talikdan. Sakit kaayo alang ni Vivian ang pagbiya ni Roger nga maoy gitugyanan niya sa iyang tanang pagmahal apan pagbudhi ang gisukli kaniya. Nakahuna-huna na gani si Vivian nga magpakamatay na lang apan nahinumdom siya sa tambag kaniadto sa iyang Tatay. “Kini ang timan-i pag-ayo Vivian nga ang problema dunay kasulbaran mao nga dili kita magpakawala sa paglaum.”

Nananghid si Vivian sa Nanay niya nga si Mamerta nga molangyaw sa dakbayan sa Sugbo. Nakasabot ang inahan sa tumong sa iyang anak mao nga wala kini mopugong.

Gibaligya ni Nanay niya ang ilang tulo ka baktin aron ang halin iyang mabawon sa dakbayan.

“Pag-ayo-ayo didto sa siyudad Vivian ug ayaw kaayo pagpadala sa kaguol,” tambag ni Nanay niya dihang nagdanga-danga na ang bus nga sakyan niya paingon sa dakbayan sa Sugbo.

Gikan sa north bus terminal misakay si Vivian og PUJ paingon sa downtown area. Naglatagaw siya paglakaw, walay tumong nga padulngan. Gipangita niya ang mga balay nga adunay karatola nga Wanted Househelper o Maid.

Nakakita si Vivian og daku-daku nga tindahan nga adunay karatola nga Wanted Tindera. Misulod siya ug nagpakisayud. “Sige dawaton ka namo. Kun wala kay kapuy-an stay-in ka lang sa compound pareho sa uban namo nga tindera,” matud sa hamtung nga tagdumala sa tindahan. (Sumpayan)