Dili molikay

Dear Tita Salie,

Maajong adlaw. Tagoa lang ako sa pangalan nga Juliet taga Bohol. Minyo nako ug dunay 7 ka buok mga anak. Mangayo gyud ko nimo og tambag niining dako kaayo nakong problema. Naglisod na gyud ko pagdala niini kay hangtod karon padayon lang gihapon kining mihasol kanako.

Nakasala man gud ang akong bana sa among kaminyoon, kay nagbinuang ug nagpakabuang man siya. Wala siya makontento nako bisan pa man kun ako siya nahatagan og 7 ka buok anak. Nangabit pa gyud siya ug duna sila’y 2 ka buok anak.

Nagkaatubangay na kami sa maong babaye, Tita Salie, ug nagtuo ko nga matapos ang tanan. Ako na lang gipasaylo ang akong bana tungod kay wala na man koy mahimo bisan pa man kun awayon nako siya kay nahitabo na man.

Pero hangtod karon gihasol lang gihapon ko sa maong problema. Kay hangtod karon ang akong bana ug ang iyang babaye duna lang gihapoy communication kay kining iyang babaye wala man molikay ug mora’g dili gyud molikay. Mao nga nakahunahuna ko nga pasakaan og kaso.

Unsang kasoha ang puwede nakong ipasaka, Tita Salie? Pila pud kaha ang magasto niini? Daghang salamat and more power.

* * *

Dear Juliet,

Maayong adlaw usab kanimo, Juliet. Maayo na lang dili kaayo init ang imong ulo sa maong hitabo ug imong napasaylo ang imong bana. Tungod kay wala ka man naghisgot sa imong sulat nga imong gibulagan ang imong bana. Wala ka maghisgot nga nawad-an ka og gana sa imong bana. So presumed nga maayo lang gihapon ang inyong tinagdanay sa usa’g-usa. Ug mao gyud kana ang insakto. Ayaw itugot nga maguba ang dugay na ninyong gitukod nga pamilya tungod lang nianang bayhana. Ipaglaban ang inyong gugma aron padayon nga magmalipayon ang inyong mga anak.

Dili kini nagpasabot nga imo lang pasagdan ang imong bana. Kay dili gyud mahitabo nga magkarelasyon sila tungod lang sa babaye, apil gyud ang imong bana niini. Mao man gani nga kun imong pasakaan og kaso ang babaye apil gyud niini ang imong bana. Ayaw lang una kini buhata. Pakig-estoryahe ang imong bana nga dili na gyud siya magbinuang.

Kun mangayo og sustento ang iyang mga anak sa gawas iya gyud kining obligasyon ang motabang sa mga bata. -- Tita Salie