Gihigugma ko ikaw ubos ug ibabaw

Marmela, gihigugma ko ikaw ... ubos ug ibabaw..” Pangaliyupo ni Bulagso kaniya nga nagluhod sa iyang atubangan. Ug tungod kay wa siya kagusto, gisikmo kini niya sa iyang tuhod. Naigo ang baba ni Bulagso, midugo ang ngabil.

“Gaba na tingali ni nako sa akong pagdaug-daog ni Bulagso,” nakatuaw si Marmela, human makahinumdom sa maong hitabo, samtang naghapyod-hapyod sa nagdako na niyang tiyan sa iyang bana-bana mga duha man kini ka bulan, sukad mapugsi siya’g binhi ni Keirdref (usa ka mestiso nga iyang klasmeyt sa high school) sa dayon na nilang graduation. Ug wala na niya magpakita pa. Nag-text na lang kini niya nga magbulag na sila kay engage na siya sa usa ka Amerkana nga nagustoan sa iyang mama didto sa Amerika.

Busa sukad niadto way laing nahuna-hunaan si Marmela nga paangkonon sa iyang gisabak. Isog kaayo iyang mga ginikanan, siguradong patyon siya sa kasuko kung mahibaw-an nga nagsabak siya ug way amahan. Saon, ambisyosa ra gyud kaayo siya, gwapo ug datu ang iyang gusto mao nga sa way duha-duha gidalitan dayon niya ang mestiso, sa iyang special delicacies. Ang bingka nga dunay pasas sa tunga sa iyang liki.

Ug sa way langan, giadto ni Marmela si Bulagso. Naabtan kini niya nga nagtugway sa iyang kabaw sa punoan sa mangga. Bag-o pa nahumag daro. Iya kining gisultian sa tanan bahin sa iyang pagkaburos sa usa ka mestiso, ug sa tuyo niini nga si Bulagso ang muangkon nga amahan.

“Dako akong kalipay sa imong balita karon Marmela. Uyon ako nga maoy mangamahan sa imong anak,” nalipay si Marmela, sa maong nadungog. Mini ug wa gyud kunoy pangutok kini si Bulagso. Ug aron mosamot ang gana ni Bulagso, ug madani gayud nga maoy mangamahan sa iyang anak gikalitan kini niya’g halok sa ngabil. Wa siya magdahon nga mobawos sa paghalok si Bulagso, gigakos ug hugot iyang hawak ug gialsa padung sa gamay’ng kamalig. Ug dinhing higayona, wa na siya’y mahimo pa, may mukaon na sab sa iyang bibingka nga dunay pasas sa tunga sa iyang liki. Ug naglaway ang adlaw nga midayb sa kasadpan.

Kaadlawon. “Ayaw baya kalimot sa imong saad nako, ha?” Gipahinumdoman ni Marmela si Bulagso sa wa pa siya molakaw pauli sa ila.

“Ayaw kabalaka, dili ka mapakyas, Marmela!” Tam-is nga saad ni Bulagso. “Moadto ko karong gabii sa inyo, aron pagpamalaye.”

Gabii. Naghuwat si Marmela, apan way Bulagso nga miabot. Naghulat pa siya’g laing mga gabii apan wala gayud. Iya na lang nasabtan nga nanimalos kaniya si Bulagso. Gibati niya karon ang kasakit. Sakit pa sa pagsikmo niya sa baba ni Bulagso nga midugo ang ngabil gamit iyang tuhod. (Katapusan)