Gusto ibalhin

Dear Tita Salie,

Maayong adlaw. Usa ko sa mga tigbasahan sa imong column ug nalipay ko kay makatabang gyod kini kanamo. Kay sa atong kinabuhi duna man gyod kita’y mga pangutana nga maglisod ta kun asa ug kinsa ang atong pangutan-on.

Tagoa lang ko sa pangalan nga Joe, usa ka minyo ug dunay anak nga duha kabuok. Swerte ko sa akong asawa, Tita, kay maayo man siya nga moatiman nako ug sa among mga anak. Maka-concentrate gyod ko sa akong trabaho tungod kay kasaligan man ang akong asawa nga kaabag. Tungod niini wala koy problema mahitungod sa akong kaminyoon.

Ang akong problema mahitungod kini sa akong kinamagulangan nga anak. Kay sa pagpanganak sa akong asawa kaniya wala pa kami makasal, busa, dili gyod puyde nga magdala ang akong anak sa akong bansagon. Apan ang nahitabo namakak mi, Tita. Amo siyang gipadala sa akong apilyedo sa among pagparehistro kaniya. Karon gusto unta namong i-adjust ang live-birth aron dili siya magproblema sa iyang mga documents. Wala ra ba mi kuwarta aron igasto alang unya sa mga bayranan, Tita.

Unsa kahay among buhaton? Palihog pasabta ko. Thank you very much and more power! -- Joe

* * *

Dear Joe,

Maayong adlaw, Joe, ayaw na hunahunaa ang pagpausab o adjust sa live-birth sa imong kinamagulangan nga anak kay imposible na kanang mahitabo. Dili gyod puyde nga mausab pa ang petsa nga gianak ang bata. Wala kanay mahimo pa kabahin sa imong problema padayon na lang ka. Ug tan-awa kun unsang tuiga gianak ang imong kinamagulangan kay tingali kun sa iyang pag-anak nahimoan na og balaod nga puyde na ang bata magdala sa bansagon sa iyang amahan bisan pa man kun ang iyang mga ginikanan wala pa makasal. Gibuhat kini nga balaod aron malikayan ang mga problema nga sama sa imong gidala karon.

Kun imong usbon ang birthdate sa imong anak, siyempre, mausab usab ang edad sa imong anak. Mosugot ka ba nga dako na ang imong anak dalagita o ulitawhay na apan sa iyang live-birth 7 years old pa lang siya? Dili gyod mahimo ang imong gihunahuna, busa, mao na gyod kana ang iyang family name nga gamiton ug ang petsa sa iyang paghimugso niining kalibotana. -- Tita Salie