Dumuduong

Gula 15

Ug namatud-an ni Maambong nga dili gayod diay angay kahadlokan ang maong bangis nga mga mananap sa lasang. Makapila na siya magbalikbalik sa pagpangayam sa lasang sa Umakba apan wala gayod siya makamatikod og mga timailhan sa giingong bangis nga mga mananap nga manunukob. Wala gani bisan anino sa banakon nga nagpakita kaniya. Alang kaniya, ang maong bangis nga mga mananap anaa ra sa hunahuna sa mga tawong taslakan. Nahigalam hinuon siya sa pagpangayam sa lasang sa Umakba tungod kay kanunay siyang magsanuoy sa iyang mga kuha nga dagko ug tambok nga mga langgam nga himuon nilang sumsoman sa iyang mga barkada sa ilang panag-inom.

Unya, taliwala sa kamingaw, naigking si Maambong. May mikuhit sa iyang pagtagad. Mora siya’g natulog nga nagdamgo ug napugwat kay napukaw sa nabati niyang kapakapa gikan sa iyang luyo. Kadali ra siyang nakalingi. Maoy iyang nakita ang usa ka langgam nga manatad. Mao pa gayoy pagbatog niini sa mabaw nga sanga sa kahoy.

Napaak ni Maambong ang ubos niyang wait. Naibog siyang nagsud-ong sa manatad. Ang iyang kahiladman mibahad sa pag-angkon sa maong langgam. Dihadiha iyang gikawhat ang airgun nga gisandig sa punoan sa bagalnga. (Sumpayan pa)