Gula 6
"Nganong kinahanglan pa man nga magpatoo ta nga mag-boyfriend?" nakapangutana si Darlyn kang Clifford nga miagbay kaniya dihang migawas na sila sa cottage.
Gipasabot ni Clifford ang guwapa nga tour guide nga kinahanglan kini aron dili bati nga tan-awon nga nag-uban sila sa usa lang ka cottage. Miubog sila sa dagat ug dihang miabot na sila sa tubig nga taga-hawak, mihapa sa tubig si Clifford.
Misunod usab si Darlyn pag-ubog sa tubig. Misibog ngadto sa lawom nga bahin nga taga dughan na ang tubig. Distansya na kini og gamay sa baybayon sanglit wala pa kaayo mitaub ang dagat.
"Enjoy kaayo ko Lyn sa akong biyahe dinhi sa inyo sa Bohol. Wala ko magdahum nga ikahimamat hinuon nako ang guwapa nga binuhat," matud ni Clifford nga nagngisi. "Atik 'sab kaayo ka Clifford uyyy," dali kaayo nga nakatubag si Darlyn nga nagpahiyom.
Mitidlum sa tubig si Darlyn ug nakapanglad-ok sa laway si Clifford. Diha sa iyang huna-huna nga panguyaban gayud niya ang iyang tour guide karong gabhiona. Sayang kaayo ang gabii nga mag-estar sila sa usa ka lawak sa cottage nga walay mahitabo.
Dihang mitunga pagbalik si Darlyn gikan sa pagtidlum niya sa tubig, gigunitan ni Clifford ang tuo niya nga palad. Gitutokan ni Clifford ang dalaga sa tinan-awan nga makahuloganon.
"Lyn, motoo ka ba sa giingon nga love at first sight?" ni Clifford pa nga seryoso ang tono sa sinultihan. "Tingali tinuod na kay duna man gani karaang kanta nga migamit sa maong ulohan nga padayong gitipigan ni Tatay," dali nga tubag ni Darlyn.
"Mao na ang akong gibatyag para kanimo Lyn dihang nakakita ko nimo ganinang buntag. Mao kini ang rason nga bisan wala ko magplano nga mokuha og tour guide, pero wala ko mobalibad sa sugyot ni Mama nimo kay para magkauban ta," pasabot ni Clifford.
Mingisi si Darlyn nga nakadungog sa gisulti ni Clifford apan klaro kaayo nga may sagol kauwaw ang iyang pahiyom. "Maayo gayud kaayo manulti kining taga Cebu no? Usahay ra ba kay bugal-bugalan lang tawon mi nga mga Bol-anon," matud ni Darlyn.
Miinsistir si Clifford nga wala siya magbinuang. "Gitug-anan gani ko nimo ganina nga ang imong girlfriend tua sa Manila kay nag-take og bar unya nganong manguyab pa man ka nako? pangutana ni Darlyn kang Clifford. Daw natuk-an si Clifford ug wa dayon makatubag.
Gitutokan niya si Darlyn ug wala gayud buhii ang paggunit niya sa tuo nga palad sa dalaga. (Sumpayan)