Gula 5
Usa ra gayud ka cottage ang gikuha nila ni Clifford ug Darlyn. Gitug-anan ni Darlyn si Clifford nga nabalaka siya kay basin og adunay mga nakahimungawong sa iyang panagway kay kanunay ra ba siya nga mo-guide og mga turista nga dad-on niya didto sa beach club kaniadto.
Nakabantay si Clifford nga naghinuktok si Darlyn pagsulod niini sa kwarto sa cottage nga ilang giabangan. Gibutang ni Clifford ang dala niya nga bag sa kabinet. Iya usab nga gikuha ang bag nga gibitbit ni Darlyn ug gipahiluna sa pikas bahin sa kabinet.
“Maligo na ta Lyn. Wad-a na gud ang kauwaw mo nako ug isipa nga tinuod nga mag-sweetheart ta’ng duha,” giingnan ni Clifford ang guwapa nga tour guide. Gikuha ni Clifford ang iyang short pants gikan sa bag ug misulod siya sa banyo.
Paggawas ni Clifford nakasul-ob na siya og short pants. Nakita niya nga giandam na diay ni Darlyn ang iyang dala nga short pants nga green.
“Sige na, pag-ilis na sa imong short pants ug shirt,” matud ni Clifford. Tuod misulod dayon si Darlyn sa banyo ug dali ra kaayo nga nakasul-ob sa iyang pangkaligo.
Misamot nga naglaway si Clifford nga nagsud-ong ni Darlyn nga karon nagsul-ob na og short pants. “Naunsa ka uy nga gitutokan man ko nimo pag-ayo,” matud ni Darlyn nga daw sa gibati’g kauwaw.
“Wala lang, nakadayeg lang ko sa porma sa imong lawas. Anugon nga dili ko ikaw girlfriend Lyn. Kaswerte sa imong boyfriend nga Hapon no?” sagol komedya ni Clifford ngadto sa dalaga.
“Sobra ra kaayo kabuotan ang boyfriend ko nga Hapon uy, kun mag-uban mi wala gayu’y mahitabo gawas sa ordinaryo nga kiss,” dali nga nakatubag si Darlyn.
Daw dili makatoo si Clifford sa gisulti ni Darlyn. “Mao ba? Sa ato pa, kutob ra mo sa kiss Lyn? Kun ako ang imong boyfriend, dili ka gayud magmahay kay tagbawon tika sa pagmahal.”
Nanggawas sila sa cottage. Dihang didto na sila sa gawas, giagbayan ni Clifford si Lyn aron nga ipatoo nga aduna sila’y relasyon. Wala masayup si Darlyn kay nakaila gayud kaniya ang usa sa kawani sa beach resort.
“Ikaw man kadtong kanunay maka-guide og mga Japanese nationals sa una ma’am no?” matud sa usa ka lalaki nga kawani sa beach resort.
Si Clifford ang midali sa pagtubag. “Yes, siya ang dati nga tour guide nga kanunay’ng magdala’g bisita nga Hapon dinhi sa una Dong. Karon wala na siya mag-guide kay kaslonon na mi.” (Sumpayan)