Gula 11
Iya kining gipatungdan aron segurado gayod nga maigo. Sa dihang nakapahimutang nag maayo, giinggansa niya ang airgun ug gipunting ang langgam nga naghiniksik nga wala gayod makaalinggat sa umaabot nga kakuyaw.
Unya, kalit lang nauknol si Maambong. Nunot sa paglupad sa buyog nga mipahit sa iyang ulo, takulahaw lang midalikyat sa iyang hunahuna si Santino. Nagduladula kini sa iyang kaisipan, mora’g nagsulogsulog kaniya. Gihugtan niya paggunit ang airgun. Gipahit niya ang ubos niyang wait samtang nagsuta sa tukmang ig-anan sa langgam. Andam na ang iyang mga tudlo sa pagkablit sa gatilyo. Pamatud-an niya karon sa iyang kaugalingon nga dili gayod hilabwan ni Santino ang iyang abilidad. Dako kaayo ang pagsalig niya sa iyang katakos.
Bang!
Halos dungan sa pagsiak sa masipang buto, nahulog ang langgam gikan sa gibatogan niini, ingon sa bunga sa kahoy nga napulak gikan sa sanga. Lagsik ang iyang mga lakang nga mipaingon sa dapit nga nahulogan sa langgam. Giwahing niya ang mga sagbot nga nagkapal sa dapit aron pagpangita sa langgam nga iyang napusilan. May lab-as nga dugo nga namilit sa mga sagbot. Iya kining gisubay. Nakit-an gilayon niya ang langgam nga wala nay kinabuhi. -- Sumpayan pa