Niawit iyang kasingkasing

Alas otso i medya sa buntag. Nisulod ko’g balik sa pansayan sa munisipyo sa lungsod sa Bupada aron sa paghuman sa paglimpiyo niini. Nasuguan ko ni Mr. Jaime Gimarangan Jr., hepe sa opisina sa Tasador, sa pagpakopya og dokumento sa tindahan nilang Meme Flores sa atbang sa munisipyo nga dunay copier.

“Dong Aldwin, paseroke ring Affidavit, Dong,” sa hepe nga nagtunol nako og dokumento ug papel de banko samtang nag-mop ko sa sawog sa CR. Kining diyanitor ta sa lungsod, utility worker man ta. O all around. Dala mang messengerial job, (Sugosugo kun unsay ipamalihog sa mga labaw og ranggo. Dunay ipapalit, ipahatud, ipakuha o pakuyogan). Usahay clerical pa gani. Di lang sab ko mobalibad kay naningkamot man kong ma-promote sa pagka-clerk. Nagtungha man ko’g Accountancy magabii.

Nisugod ko’g mop sa sawog sa dapit akong gibiyaan tungod sa bintana sa CR. Unya may niagulo sa sulod sa usa ka lawak pansayan. Lalaki ang tingog sa agulo kay CR man sa lalaki akong gilimpiyohan.

“Oooohhh! Aaaahhh! Arrgghh!” matud sa tawo sa sulod. Daw giatake sa kasingkasing samtang nagdiskarga og hugaw. Nakuratan ko. Naurong sa akong gibuhat. Katoktokon ko sa siradong pultahan sa kalibangan. (Usa sa duha ka lawak kalibangan dapit sa wala) Katawgonon ko’g ambulansiya. Naa ra man ang ambulansiya gi-parking tapad sa bomberohan. Gisandig nako ang kahoy sa mop sa eskina nga bongbong sa CR. Nidali ko’g lakang padulong sa gawas sa pansayan.

Kadaghan na man god ko kadungog og mga balita nga dunay giatake sa sakit sulod sa pansayan. Niutong kono pag-ayo kay naglisod og paggawas sa hugaw. Unya giatake sa hayblad o kasingkasing. Basig usa ni sa maong hitabo. Wa ra ba ko kaila kun kinsa ning tawhana sulod sa pansayan. Daghan mang mobisita dinhi sa munisipyo. Nia ang opisina sa mayor, bise mayor, ug mga konsehal. Nia ang opisina sa tresurero sa lungsod ug tasador. Nia ang Municipal Trial Court, Municipal Health Office. Naa sa tupad ang estasyon sa pulis ug ang estasyon sa bombero.

“Ooohhh! Aaaaahhhh! Arrgghhhh!” Padayon nga nag-agulo ang tawo pag-abot nako sa koridor. Gilingi nako’g balik ang pansayan. Wa man sab mangabli sa pultahan ang tawo. Kun pasagdahan ko lang na siya diha, kun unsay mahitabo niya, basig ako’y mabasol nga wa gyud ko nitawag og panabang.

Nakahukom ko nga mobalik aron sutaon kun nagkinahanglan ba’g panabang ang tawo. Kay basig maulawan sab unya ko. Nga magkarakara og tawag og ambulansiya. Unya wa diay siya maunsa. Gituktok nako ang pultahan sa pansayan diin naggikan ang agulo sa tawo. Tok tok tok.

“Bosing! OK ka lang diha?” nako pa. Nagkurog na sa kakulba. Nangluspad ug gipaningot. Nahilom ang tawo!

“Wa na! Patay na ang tawo!” sa akong hunahuna. Kadaganon ko’s Rural Doctor. Unya nakadungog ko’g hinay nga hinangos. Tok Tok Tok. Gituktok nako’g usab.

“Bosing! Nagkinahanglan ka’g panabang?” nako pa sa nagkurog nga tingog.

Unya nakadungog ko’g humming.

“Hu hummm hmmm hhmmm hmm hmmm hu hmmm hmmm” gikan sa nalibang sa sulod. Ang tono sa hum awit nga nag-ulohan.

“Ikaw Ang Pangarap” theme song sa telenobela nga Lobo. Awit ni Martin Nievera ug Piolo Pascual ang maogn theme song. Nagsige og humming ang tawo sa sulod. Nagpasabot lang diay nga wa siya’y problema.

Ako unta siyang atngan mogawas. Aron makita nako ang hitsura niya o kun kaila ba ko’g kinsa siya. Aron sab ako siyang mapangutana kun naunsa gyud siya. Apan nasuguan ko’g usab ni Mr. Gimarangan. Duna na sab siya’y laing pamalihog nako. May dugang mga dokumento nga gipakopyahan. Dugaydugay kong nahibalik sa CR.

Paghibalik nako sa pansayan, wa nay nagtingog sa kalibangan. Akong giablihan ang duha ka kalibangan. Wa nay sulod. Akong duda gialmoranas tong tawhana. Gisakitan samtang wa pa kahimugso-i. Unya dihang nahimugsoan na, niawit iyang kasingkasing. (Katapusan)