Hapi-hapi sa Bohol

Gula 3

Ang masi’g ka lovelife nila ni Clifford ug Darlyn maoy ilang gipanagsultihan samtang nagdagan ang kotse paingon sa lungsod sa Carmen, Bohol.

“Tua sa Manila nag-take og bar ang akong girlfriend Lyn. Maayo ra usab nga dili nako siya kauban kay dili ko malingaw pakig-uban nimo kun naa siya,” gikomedyahan ni Clifford si Darlyn.

Mipahiyom si Darlyn nga nakadungog sa komedya ni Clifford. “Ikaw ha nakabantay ko nga bilyako ka sa babaye.” Nagkataw-anay silang duha. Dali ra kaayo sila nga nagkasuod. Kapin lang sa usa ka oras ang pagbiyahe nila ug miabot sila sa Chocolate Hills.

Gitungas nila ang taas kaayo nga hagdan nga semento hangtud nga miabot sila sa kinatumyan sa bungtod. Gitug-anan ni Darlyn si Clifford nga ang bungtod nga adunay hagdan maoy labing taas sa kapin sa usa ka libo ka bungtod sa Chocolate Hills.

Gikan sa kinatumyan sa bungtod, gilantaw ni Clifford ang nahimutangan sa Cebu. Gisuwayan niya kun makita pa ang dakbayan sa Sugbo sa ilang nahimutangan, apan ang tumoy ra sa mga habog nga kabungtoran ang iyang nakita.

Nahuna-huna ni Clifford nga samtang didto pa siya sa iyang opisina sa Cebu City nga nag-umbaw sa Lapulapu, iyang makita ang kabungturan sa Bohol apil na ang Chocolate Hills mao nga nadasig siya pagbisita sa Bohol.

Gawas kanila ni Clifford ug Darlyn, dunay daghang mga tawo nga mibisita sa maong popular kaayo nga tourist spot sa Bohol. Dunay mga managhinigugmaay kay maklaro man nga nagparayganay samtang nagkalingaw pagsud-ong sa palibot.

Gipasiklapan ni Clifford ang pustora ni Darlyn nga nalingaw sa pagkuha og mga hulagway. Sa hilom nakadayeg si Clifford sa kaanyag ni Darlyn, ilabi na sa porma sa iyang lawas. Sa gisugilon ni Darlyn kaniya kaganina nga usa ka Hapon ang iyang boyfriend, apan tua pa kini sa Japan.

“Gikan dinhi sa Chocolate Hills, mohapit ta sa dapit nga daghang tarsiers, unya adto ta mag-lunch sa Loboc River sakay sa tinuyo paghimo nga sakayan para sa mga local ug foreign tourists,” giingnan ni Darlyn si Clifford.

Nanaug sila sa habog kaayo nga hagdan nga semento. Migawas ang pagka gentleman ni Clifford, iyang gigunitan ang kamot ni Darlyn. “Hala, ka caring nimo Cliff uy.”

Nanakay sila balik sa kotse ug misirit paingon sa dapit nga nahimutangan sa daghang mga gagmay’ng unggoy. Daw dili tour guide si Darlyn kang Clifford kun mora ra sila’g mag-sweetheart tan-awon. (Sumpayan)