Wala magdahom

Dear Tita Salie,

Have a wonderful day. Just call me Ms. Cancer, minyo ug dunay 2 ka buok anak. Malipayon unta kaayo ang among pagpuyo kun wala lay milagro nga gibuhat ang akong bana nga maoy nakahasol kanako pag-ayo karon.

Mapinanggaon kaayo kining akong bana nako ug sa among mga anak. Kugihan usab siya naningkamot man gyud siya aron dili kaayo lisod ang among pagpuyo ug duna siya’y plano sa among mga bata.

Apan kalit lang ko nga nahugno dihang akong nadunggan ang usa ka estorya mahitungod sa akong bana. Wala ko kasabot sa akong gibati dihang akong nasayran nga dunay anak ang akong bana ngadto sa laing babaye. Wala gyud ko magdahom nga iya kining mabuhat tungod kay sa akong tan-aw malipayon man siya uban kanamo, mora ba og anaa lang kanamo ang iyang attention. Apan nasayop diay ko, Tita Salie. Magsige raba kuno og pangita ang bata sa iyang amahan.

Miangkon gyud ang akong bana nga tinuod ang estorya, Tita. Nabuhat niya kini bisan kun kasal na mi. Naglagot ko pag-ayo sa akong bana ug wala na ko masayod sa akong buhaton.

Palihog tabangi ko ug pasabta ko. Thank you very much and more power. God bless. -- Ms. Cancer

* * *

Dear Ms. Cancer,

Bisan tuod og shocking kaayo ang nahitabo tungod kay dako kaayo ka’g pagsalig sa imong bana maoy imong hunahuna nga ang usa ka sayop dili masulbad sa pagbuhat og laing sayop. Bisan pa man kun mag-wild ug manghagis ka dili kini makapausab sa pagpanghitabo ug labaw pang dili kini makahatag og kasulbaran sa problema. Kun mainiton usab ang atong ulo dili kita makahunahuna pag-ayo ug maglisod na hinuon ka pag-handle sa maong sitwasyon. Mas makaayo gihapon nga atong ma-control ang atong kaugalingon.

Ang una nimong buhaton mao ang pagdawat sa sitwasyon nga nakasala ang imong bana. Ug dili na kini puyde nga usban ang maong hitabo, busa, dawata. Kun bugnaw na ang imong ulo estoryahe ninyo uban sa imong bana ang problema. Ayaw iapil ang mga bata aron dili sila magbaton og kalagot ngadto sa ilang papa.

Kun mangayo man siya nimo og pasaylo ayaw dugaya paghatag ang iyang gipangayo kun kaya na nimo nga mopasaylo. Pero kun bug-at pa sa imong buot pangayo lang og higayon kaniya. Pero kun andam ka pa nga mohatag kaniya og laing higayon ayaw pasagdi ang garbo nga moguba sa inyong pamilya.

Siyempre, dunay responsibilidad ang imong bana ngadto sa iyang anak sa gawas. So, kun gikinahanglan sa bata nga iyang suporta inyo gyod kining gahinan. -- Tita Salie