Hapi-hapi sa Bohol

Gula 2

Dali ra nga nakahuman sa iyang breakfast si Clifford. "Sigi Lyn, walay problema sa akong bayad nimo. Nindot usab nga babaye ang akong guide kay aron malingaw ko sa akong biyahe," matud ni Clifford nga nagngisi.

Giubanan ni Darlyn si Clifford sa balay sa tawo nga sagad magpaabang sa iyang kotse alang sa pagsuroy-suroy sa lainlaing tourists spots sa Bohol. Dali ra nila nga nasabot ang tag-iya sa kotse pagkasayud nga taga Cebu City ang moabang sa iyang sakyanan.

Gihatagan ni Clifford og P5,000 ang tag-iya sa kotse nga iyang abangan isip deposito. Bag-o pa nga Nissan Sentra ang kotse nga iyang naabangan. Gibutang dayon ni Clifford ang iyang bag sa baggage sa kotse ug nanakay sila si Darlyn.

"Hapit usa ta sa balay Cliff kay magdala ko'g gamay'ng sinena kay basin og manghagad ka unya og pangaligo sa mga nindot namo nga beach resort dinhi sa Bohol," matud ni Darlyn. Gisinyasan ni Darlyn si Clifford nga mohunong sa usa ka balay nga nahimutang sa Torralba Street.

Wala na manaug pa si Clifford sa kotse. Nagpanilap si Clifford nga nagsud-ong sa igwad kaayo'g sampot sa iyang tour guide samtang misulod kini sa ilang balay. Nagkalingaw si Clifford sa pagpaminaw og mga music sa car stereo.

Wala gayud unta'y plano si Clifford nga mokuha og tawo nga maka-guide kaniya pag-adto sa mga tourist spots sa Bohol apan giisip niya nga sulagma na kaayo nga gikahimamat niya si Darlyn. Wala danti og tunga sa oras, nabalik na si Darlyn nga nagdala og back pack.

Gitabangan ni Clifford si Darlyn nga mapahiluna ang dala niini sa back seat. Gipadagan ni Clifford ang kotse. "Hapit usa sa gas station sa pikas eskena aron makapatubil ka og gasolina," giingnan ni Darlyn si Clifford.

Human makapakarga og gasolina si Clifford, misirit sila sa ilang biyahe. "Mouna lang ta sa Chocolate Hills, ug inigbalik na ta mohapit sa dapit nga daghang tarsier, sa karaang simbahan sa Baclayon ug sa dapit nga gihimoan sa blood compact nila ni Datu Sikatuna ug Miguel Lopez de Legazpi," matud ni Darlyn.

"Giswerte ko sa akong biyahe Darlyn," giingnan ni Clifford ang gwapa niya nga tour guide. "Ngano man Cliff?" dali nga tubag ni Darlyn.

"Bahala na og makagasto ko basta gwapa ang tour guide nga akong kauban. Mora ni og deyt nga ang kauban dili uyab," sagol-komedya ni Clifford kang Darlyn. "Bitaw, nganong wala man nimo giuban ang imong girlfriend Cliff?" nangutana si Darlyn. (Sumpayan)